FAO Ərzaq və Kənd Təsərrüfatında Dayanıqlı İnkişaf Məqsədlərinin həyata keçirilməsində Azərbaycanı dəstəkləyir

Tədbir kənd təsərrüfatı, ərzaq, meşə təsərrüfatı və balıqçılıq sahələrində dövlət qurumları, eləcə də özəl sektor, vətəndaş cəmiyyəti və akademik dairələrinin 45 nümayəndəsi,  habelə BMT və digər beynəlxalq təşkilatların təmsilçilərini bir araya gətirib.

Azərbaycanda kənd təsərrüfatı və DİM-lər arasında çoxtərəfli və çoxməqsədli əlaqələri təhlil etməklə seminar, kənd təsərrüfatının inklüziv və dayanıqlı inkişafa, eləcə də milli iqtisadiyyatın şaxələndirilməsinə potensial töhfəsinin başa düşülməsini artırmağa yönəlib. Kənd təsərrüfatı, ərzaq, meşə təsərrüfatı və balıqçılıq fəaliyyətlərinin Azərbaycanda DİM-lərə nail olunması üçün verəcəyi töhfənin artırılması yolları və lazımi tədbirlər də müzakirə olunub.

Baş Nazirin müavini və Dayanıqlı İnkişaf üzrə Milli Əlaqələndirmə Şurasının sədri Əli Əhmədov, Kənd Təsərrüfatı naziri İnam Kərimov, BMT-nin rezident əlaqələndiricisi Qulam İshaqzai və FAO-nun Azərbaycandakı Tərəfdaşlıq və Əlaqələndirmə Ofisinin rəhbəri Mələk Çakmakın açılış nitqlərindən sonra FAO-nun layihəsi çərçivəsində çəkilmiş Dayanıqlı İnkişaf Məqsədləri ilə bağlı qısa film nümayiş olunub.

Bundan başqa, FAO-nun Dayanıqlı Kənd Təsərrüfatı Proqramı üzrə əlaqələndiricisi cənab Evald Rametştayner, FAO-nun regional statistika üzrə mütəxəssisi cənab Giorgi Kvinikadze, Vyananın Təbii Sərvətlər və Həyat Elmləri Universitetinin (BOKU) eksperti cənab Həmid Əl Bilali, Ernst & Young şirkətinin təmsilçisi, eləcə də Kənd Təsərrüfatı Nazirliyi, Ailə, Qadın və Uşaq Problemləri üzrə Dövlət Komitəsi, Meliorasiya və Su Təsərrüfatı ASC/ Azərsu və Ekologiya və Təbii Sərvətlər Nazirliyindən nümayəndələr tədbirdə çıxış edib.

Seminar BOKU-nun texniki və elmi dəstəyi ilə icra olunan FAO-nun “Azərbaycanda Dayanıqlı İnkişaf Məqsədlərinin həyata keçirilməsində potensialın inkişafına dəstək” layihəsi çərçivəsində təşkil olunub.