BMT-nin ölkə üzrə idarə heyəti Tərtər rayonunda məcburi köçkünlər üçün salınmış qəsəbəyə səfər ediblər

İdarə heyətinin üzvləri məcburi köçkünlər üçün salınmış yeni qəsəbədə “Köçkünlərlə bir gün: heç kəs diqqətdən kənar qalmır” adlı tədbirdə iştirak edib.  

Tədbirdə açılış nitqi ilə çıxış edən BMT-nin Azərbaycandakı rezident əlaqələndiricisi Qulam İshaqzai deyib: “Biz əlimizdən gələni edirik ki, məcburi köçkünlər sosial-iqtisadi proqramlardan və BMT-nin ölkənizdə fəaliyyət göstərən agentliklərinin həyata keçirdiyi və ya maliyyələşdirdiyi layihələrdən bərabər şəkildə bəhrələnə bilsinlər. Bu layihələrin məqsədi iqtisadiyyatı və həyat səviyyəsini inkişaf etdirməklə, ətraf mühiti qorumaqla, səhiyyə, təhsil və digər sosial xidmətlərin keyfiyyətini artırmaqla, insanların sosial və iqtisadi rifahını yaxşılaşdırmaqdır.”

Tədbirdən sonra, idarə heyətinin üzvləri və Azərbaycan hökumətinin nümayəndələri Tərtər rayonunun Bəyimsarov kəndinə səfər edərək, orada məskunlaşan məcburi köçkünlərlə görüşüblər. BMT-nin Gənclərdən ibarət Məşvərət Şurası isə öz növbəsində məcburi köçkün gənclərə Dayanıqlı İnkişaf Məqsədlərinə dair təlim keçib.