Azərbaycanda aqrar məsləhət xidmətlərinin gücləndirilməsi məqsədilə beşillik strategiya hazırlanır

Layihə çərçivəsində, həmçinin 2 regionda – Gəncə-Qazax və Quba-Xaçmaz regionlarında pilot aqrar məsləhət xidmətləri modelləri də tətbiq edilərək hökumətə tövsiyə olunacaq. Layihənin idarə heyətinin ikinci görüşündə pilot regionlarda aqrar sahənin təsvirinin və sorğuların nəticələri, COVID-19 pandemiyası səbəbindən yaranan çətinliklər təqdim edilib. 

«Azərbaycan dövlətinin aqrar sahənin inkişafı üçün gördüyü işlərin tərkib hissəsi kimi başlanan “Aqrar məsləhət xidmətlərinin gücləndirilməsi” layihəsi çərçivəsində görüləcək işlərin dayanıqlı və uzunömürlü olması çox vacibdir”, - Rayner Freund, Avropa İttifaqının Azərbaycan Respublikasındakı nümayəndəliyinin proqram rəhbəri.  “Layihə çərçivəsində işlənəcək pilot aqrar xidmətləri modelləri gələcəkdə ölkədə qurulacaq modellərin necə olacağını göstərə biləcək” – cənab Freund qeyd edib. 

BMT Ərzaq və Kənd Təsərrüfatı Təşkilatının Azərbaycandakı nümayəndəliyinin rəhbəri Mələk Çakmak hazırlanmaqda olan aqrar məsləhət xidmətləri ilə bağlı qanun layihəsinin “Aqrar məsləhət xidmətlərinin gücləndirilməsi” layihəsinin tövsiyə və nəticələrindən faydalanmalı olduğunu diqqətə çəkib. “Biz çalışmalıyıq ki, aqrar məsləhət xidmətlərinin icrası ilə bağlı tövsiyələrimiz qanunvericilik çərçivəsində öz əksini tapsın. Layihənin nəticə və qənaətlərindən Kənd Təsərrüfatı Nazirliyi faydalandığı təqdirdə biz layihəmizin dayanıqlığından danışa bilərik” – xanım Çakmak deyib. 

Aqrar Elm və İnnovasiya Mərkəzinin İctimai informasiya və beynəlxalq əlaqələr şöbəsinin aparıcı mütəxəssisi Yaqub Quliyev layihədən gözləntinin Azərbaycanda aqrar məsləhət xidməti üçün yerli şəraitə uyğun bir sistem yaradılması olduğunu bildirib. “Ən vacib məsələlərdən biri Azərbaycanda aqrar məsləhət xidməti göstərənlər arasında əlaqə qurulmasıdır. Bu da səmərəli aqrar məsləhət xidmətini təmin edəcək” – cənab Quliyev vurğulayıb.

İdarə Heyətinin iclasında 2 pilot regionda və hədəf regionu kimi seçilmiş Lənkəran iqtisadi rayonunda 700 nəfərdən artıq fermer arasında aqrar məsləhət xidmətləri barədə götürülmüş sorğunun nəticələri təqdim edilib. Bildirilib ki, inkişaf etmiş ölkələrin aqrar məsləhət xidməti modelləri pilot olaraq seçildikdə bu sorğuların nəticələrinə uyğun olaraq lokallaşdırılacaq.

Əlaqə üçün şəxs: Afət Yaqubova – kommunikasiya üzrə mütəxəssis (Mob.0502520247)