Beynəlxalq Miqrasiya Təşkilatının Azərbaycan nümayəndəliyi ölkəyə könüllü qayıdan miqrantlara reinteqrasiya yardımı üzrə fəaliyyətini genişləndirməkdədir

Bu zaman əməkdaşların təhlükəsiz şəkildə işlərini icra etmələri üçün işçilərin və binaya daxil olan qonaqların temperaturu yoxlanılır, Ümumdünya Səhiyyə Təşkilatının COVID-19-la bağlı tövsiyə və qaydaları, gigiyena proseduralarına əməl olunur, maskalar, əlcəklər, əl üçün dezinfeksiyaedici məhlullar kimi qoruyucu vasitələrdən istifadə olunur. 

Cari ilin əvvəlindən iyul ayının sonunadək BMqT-nin Azərbaycan nümayəndəliyi KQYR layihəsi çərçivəsində könüllü qayıdan şəxslərə 185 qeyri-nağd yardım göstərmişdir. Onlardan 24 şəxsə müvəqqəti mənzil (kirayə) təminatı, 30 şəxsə kiçik biznesin təşkili, 120 şəxsə maddi yardım (avadanlıq və zəruri mebel əşyaları), 10 şəxsə tibbi yardım və 1 şəxsə təhsillə bağlı köməklik göstərilmişdir.

Xəyyam (ad şərtidir) bəy BMqT-nin adı çəkilən layihəsi çərçivəsində İsveçrədən könüllü vətənə qayıdan Azərbaycan vətəndaşlarından biridir. O, cari ilin fevral ayında ailəsi ilə birgə Azərbaycana qayıtmışdır. Onun sözlərinə görə, xaricə mühacirət etməmişdən əvvəl işləyib və maddi cəhətdən heç bir çətinlik çəkməyib: “Hazırda xaricə gedənlər haqqında bir fikir formalaşıb ki, onlar daha yaxşı həyat dalınca ora gedirlər. Əslində onların arasında Azərbaycanda ala bilmədikləri müalicə üçün gedənlərin sayı da kifayət qədərdir. Onlardan biri də mənəm. Mən uzun müddət mühəndis, şöbə rəisi vəzifələrində çalışmışam. Yəni xaricə getməyimin səbəbi heç də maddiyyat olmayıb. Biz İsveçrədə 2 il yaşadıq. Orada yaşayış xərcləri çox, gəlir isə az idi. Qazancım nəinki müalicəmə, hətta normal dolanışığımıza çatmırdı”. 

Bütün bu çətinliklər bir yana, Vətən həsrəti də onu geri dönmək haqda düşünməyə vadar edirdi: “Beynəlxalq Miqrasiya Təşkilatının həyata keçirdiyi Könüllü Qayıdışa Yardım və Reinteqrasiya layihəsi haqda tanışlardan məlumat alan kimi vaxt itirmədən təşkilatın yerli ofisinə müraciət etdik. BMqT ailəmizin vətənə dönüş xərclərini qarşılamaqla bərabər, Azərbaycan nümayəndəliyi vasitəsilə bizə konsultasiya xidməti və reinteqrasiya yardımı göstərmişdir. Yerli nümayəndəliyin əməkdaşları seçdiyim işə başlamaq üçün lazımi addımları və qanunvericiliyi başa saldılar, hərtərəfli köməklik göstərdilər. Nümayəndəliyin göstərdiyi yardım vasitəsilə taksi xidməti göstərmək üçün avtomobil aldım. Hazırda insanlara taksi xidməti göstərməklə ailəmi dolandırıram”. 

“Şükür öz Vətənimdəyəm. Oraları görməmişdim, adama qəribə gəlirdi. Getdim gördüm. Yaxşısı öz doğma Vətənində yaşamaqdır”, deyir Xəyyam. 

Qeyd edək ki, BMqT-nin nümayəndəliyi hazırda İsveçrə, Almaniya, Macarıstan, Belçika, Hollandiya, Türkiyə və Latviyadan qayıdan miqrantlara yardım fəaliyyətini göstərir. Reinteqrasiya yardımının əsas istiqamətlərindən biri könüllü qayıdan şəxslər üçün təhsilin artırılması, habelə müvəqqəti mənzil təminatı (kirayə) ilə yanaşı, məşğulluq və ya kiçik biznesin qurulması kimi gəlir gətirən fəaliyyət sahələridir.