Beynəlxalq Miqrasiya Təşkilatı insan alveri qurbanlarına birbaşa yardım və sığınacaq yerlərinin təkmilləşdirilməsi işini davam etdirir

Qısa müddətli bu layihə Gəncə şəhərində yerləşən TƏMAS Regional İnkişaf İctimai Birliyinin idarə etdiyi sığınacağın texniki potensialını artırmağa imkan yaradacaq, eləcə də insan alveri qurbanlarına, insan alverinə həssas olan şəxslərə və onların ailələrinə göstərilən qayğı və dəstəyin artırılmasına birbaşa töhfə verəcək.  Bundan əlavə, layihə insan alverinə məruz qalan insanlar və vətəndaş cəmiyyəti təşkilatları, müvafiq dövlət qurumları və özəl sektor arasında qurbanlara və insan alveri təhlükəsinə məruz qalan şəxslərə qrant verilməsi ilə bağlı praktiki aspektlər üzrə koordinasiya və əlaqəni gücləndirəcək, həmçinin tərəflərarası dialoqun davam etdirilməsinə təşviq edəcək. Layihə çərçivəsində insan alveri qurbanlarının cəmiyyətə inteqrasiyasına dəstək vermək üçün əsas bacarıqlar üzrə təlimlər həyata keçirilməsi və 20 nəfər təlim iştirakçısına fərdi iş planlarına uyğun olaraq ləvazimat və xammalın alınması üçün qrantlar verilməsi nəzərdə tutulur.

Ümumilikdə, bu layihə birbaşa yardım göstərməklə və sığınacaqlarda yaşayış şəraitinin yaxşılaşdırılması vasitəsilə insan alveri qurbanlarının və insan alveri təhlükəsi altında olan şəxslərin müdafiəsini təkmilləşdirməklə insan alverinə qarşı mübarizə sahəsində Azərbaycan hökümətinə və vətəndaş cəmiyyətinə kömək etmək məqsədi daşıyır.