Qulam İshaqzainin Azərbaycanda BMT Günü ilə bağlı keçirilən tədbirdə çıxışı

Xarici işlər nazirinin müavini, zati-aliləri cənab Mahmud Məmməd-Quliyev!

Hörmətli Parlament üzvləri!

Hörmətli hökumət nümayəndələri!

Diplomatik korpus nümayəndələri və inkişaf sahəsində fəaliyyət göstərən tərəfdaşlar!

Birləşmiş Millətlər Təşkilatından olan həmkarlarım!

Hörmətli qonaqlar!

BMT-nin Azərbaycandakı bütün heyəti adından hamınızı səmimi qəlbdən salamlayıram və BMT Gününü bizimlə birgə qeyd etdiyiniz üçün sizə təşəkkür edirəm!

Bəzilərinizin bu axşam digər tədbirlərə getməli olduğunuzu nəzərə alaraq, burada iştirakınızı yüksək qiymətləndirirəm.

Xanımlar və cənablar!

72 il əvvəl, oktyabrın 24-də üzv ölkələrin BMT-nin Nizamnaməsini ratifikasiya etməsi ilə Birləşmiş Millətlər Təşkilatı yarandı. Həmin vaxtdan bəri, bu gün bütün dünyada BMT Günü kimi qeyd edilir.

Bu il Azərbaycanın Birləşmiş Millətlər Təşkilatına üzvlüyünün və BMT-nin Azərbaycanda rəsmi fəaliyyətə başlamasının 25 illiyini qeyd etdiyimiz üçün, builki BMT Günü xüsusi əhəmiyyət daşıyır.

Bu gümüş yubiley münasibəti ilə 25 illik əməkdaşlığımızı əks etdirən yüz fotoşəkildən ibarət xatirə kitabı hazırlamışıq.

Bu şəkillərdə prezident Heydər Əliyevin BMT-nin Baş Assambleyasının 49-cu sessiyasındakı ilk müraciətindən, BMT-nin Baş Katibi Butros Butros Qalinin 1994-cü ildə Azərbaycana ilk səfərindən tutmuş, Bakıda BMT-nin ilk ofisinin yaradılmasına qədər 25 illik tariximizin önəmli anları canlanır.

Bu şəkillər vasitəsilə biz Azərbaycanın BMT sistemində fəal iştirakını və verdiyi töhfələri, o cümlədən BMT-nin sülhməramlı əməliyyatlarına dəstəyi, BMT-nin müxtəlif qurumlarında üzvlüyü, mədəniyyətlərarası dialoqun, millətlər arasında tolerantlıq və anlaşmanın təşviqi sahəsində bir çox beynəlxalq tədbirlərə ev sahibliyi etməsini nümayiş etdiririk.

Eyni zamanda bu fotoşəkillər 1992-ci ildən bəri BMT-nin Azərbaycana göstərdiyi humanitar və inkişaf yardımının tarixçəsini əks etdirir. Bu kitabın səhifələrindən göründüyü kimi, BMT 1990-cı illərdə minlərlə qaçqın və köçkünə humanitar yardım göstərilərkən ön cərgədə yer alıb və münaqişədən sonrakı bərpa səylərində Azərbaycanın əsas yardımçılarından olub.

Həmin vaxt BMT-nin yardımı o dərəcədə vacib olub ki, baş nazirin müavini cənab Əli Həsənov çıxışlarının birində belə deyib:

“Əgər 1990-cı illərin əvvəlində BMT olmasaydı və yardım göstərməsəydi, dəhşətli nəticələrə gətirib çıxara biləcək humanitar böhran yaranardı.”

Azərbaycan stabillik əldə etdikcə, BMT özünün səhiyyə, təhsil, məşğulluq, kənd təsərrüfatı, ətraf mühit, insan haqları, miqrasiya və qaçqınlar, uşaqlar, qadınlar və gənclər sahələrindəki 18 rezident və qeyri-rezident qurumu vasitəsilə Minilliyin İnkişaf Məqsədlərinə nail olmaqda Azərbaycana köməyini davam etdirib.

Bütün bu illər ərzində BMT həm çətin, həm də yaxşı vaxtlarda Azərbaycan hökumətinin və xalqının etibarlı tərəfdaşı olub və gələcəkdə də olacaq.

Xanımlar və cənablar!

BMT-nin əməkdaşlarının fədakarlığı və qətiyyəti olmadan bu nailiyyəti əldə etmək mümkün olmazdı. Bu 25-ci ildönümündə onların çəkdikləri zəhməti və göstərdiyi fədakarlıqları xatırlatmaq yerinə düşər.

Fürsətdən istifadə edərək, keçmiş baş katib Pan Ki Munun da çox yaxşı ifadə etdiyi kimi, hər birimizə məxsus olan bu əlamətdar gün münasibətilə hər birimizi təbrik etmək istərdim:

“Dövlət bayraqları dünyanın hər bir ölkəsində qürur və vətənpərvərlik rəmzidir. Lakin hər birimizə məxsus olan yalnız bir bayraq var və o, Birləşmiş Millətlər Təşkilatının mavi bayrağıdır ki, yaranmasından 70 il sonra hələ də bütün bəşəriyyət üçün ümid bayrağıdır.”

Sözü uzatmadan, Birləşmiş Millətlər Təşkilatının Azərbaycandakı heyəti adından bu imzalı nüsxəni Azərbaycan Hökumətinə olan ehtiramımızın və dəstəyin nişanəsi olaraq zati-alilərinizə təqdim etmək istərdim.

Hörmətli qonaqlar!

Kitabın nüsxələri daha sonra sizə göndəriləcək. İndi isə sizi fotolardan bəzilərinin yer aldığı çöldəki sərgimizə baxmağa dəvət edirəm.

Həmçinin fürsətdən istifadə edərək, tərəfdaşlığımızın 25 illiyinə həsr olunmuş xüsusi poçt markasının hazırlanmasına görə Nəqliyyat, Rabitə və Yüksək Texnologiyalar Nazirliyinə təşəkkürümü bildirmək istərdim. Bu poçt markası ekranda nümayiş etdiriləcək.

Son olaraq, bu səhər Hicran xanım Hüseynova tərəfindən mənə verilən mükafatı rəsmi olaraq nümayiş etdirmək istərdim. Təəssüf ki,o, bu tədbirdə iştirak edə bilmədi. Bu xatirə diplomu BMT-nin Ailə, Qadın və Uşaq Problemləri üzrə Dövlət Komitəsinə göstərdiyi dəstəyə görə minnətdarlıq əlaməti olaraq təqdim edilib.

Təşəkkür edirəm!