BMT-nin Ərzaq və Kənd Təsərrüfatı Təşkilatı (FAO) Azərbaycanda ərzaq və kənd təsərrüfatının inkişafında özəl sektorun rolu ilə bağlı müzakirələri dəstəkləyir

Tədbirdə dövlət müəssisələri, beynəlxalq təşkilatlar, özəl sektor və vətəndaş cəmiyyətinin nümayəndələri də daxil olmaqla 150 nəfər iştirak edib.

Seminarın məqsədi Dayanıqlı İnkişafla bağlı 2030-cu il Gündəliyi haqqında özəl sektorun məlumatlılığını artırmaq, eləcə də Azərbaycanda DİM-lərin icrasında iştiraka dair dövlət və özəl sektor arasında müzakirələrin aparılmasına şərait yaratmaq idi.

İştirakçılar həmçinin DİM-lərin biznes modellərinə inteqrasiyası və dayanıqlı inkişaf üzrə hesabatların hazırlanması ilə bağlı bilik və təcrübələri paylaşıblar. Bundan başqa onlar iqlim dəyişikliyi və ölkənin müəyyən etdiyi töhfələrə xüsusi diqqət yetirməklə ümumi maraq kəsb edən sahələrə yerli özəl sektorun səfərbər edilməsi yollarına dair fikir mübadiləsi aparıblar.

Kənd təsərrüfatı sahəsi, xüsusilə də kənd yerlərində, Azərbaycanda iqtisadi artım və dayanıqlı inkişafın sürətləndirilməsində mühüm rol oynayır. Bu, neft sənayesi və inşaatdan sonra ölkədə üçüncü ən böyük sektordur. Qida sektoru da həmçinin, ümumi istehsalın 32%-ni təmin etməklə, qeyri-neft sənayesinin əhəmiyyətli bir hissəsini tutur.

FAO, ölkədə ərzaq təhlükəsizliyinin artırılmasına səbəb olan dayanıqlı qida və kənd təsərrüfatını təmin etmək, qida və kənd təsərrüfatı istehsalı sistemlərinin məhsuldarlığını artırmaq və kənd təsərrüfatı istehsalını şaxələndirmək istiqamətində Azərbaycan hökumətinin səylərini dəstəkləyir.

Seminar, “Azərbaycanda ərzaq və kənd təsərrüfatında DİM-lərin yerinə yetirilməsində özəl sektorun cəlb olunması və investisiya fəallığının təmin edilməsi” layihəsi çərçivəsində təşkil edilib.