BMT-nin Rezident Əlaqələndiricisi Qulam İshaqzainin Beynəlxalq Sülh Gününə həsr olunmuş tədbirdə çıxışı

İDEA İctimai Birliyinin təsisçisi Leyla xanım Əliyeva!

Azərbaycanın əmək və əhalinin sosial müdafiəsi naziri cənab Sahil Babayev!

Azərbaycanın İnsan Hüquqları üzrə Müvəkkili Elmira xanım Süleymanova!

Hörmətli qonaqlar! Xanımlar və cənablar!

Bugünkü tədbirdə – Beynəlxalq Sülh Gününə həsr olunmuş “Dünyaya sülh” tədbirində çıxış etmək üçün mənə söz verdiklərinə görə təşkilatçılara təşəkkürümü bildirmək istərdim.

Beynəlxalq Sülh Günü hər il sentyabrın 21-də dünyanın hər yerində qeyd olunur. Baş Assambleya bu günü həm ölkələr daxilində, həm də ölkələr və xalqlar arasında sülh ideallarının gücləndirilməsi üçün təsis edib.

BMT-nin üzv dövlətləri 2015-ci ildə Dayanıqlı İnkişaf Məqsədlərini qəbul etdi, çünki onlar başa düşürdülər ki, dünyanın hər yerində bütün insanlar üçün sosial-iqtisadi inkişafa nail olmaq və onların hüquqlarının qorunmasını təmin etmək məqsədilə addımlar atılmadan dünyada sülh təmin edilə bilməz.

Dayanıqlı İnkişaf Məqsədləri yoxsulluq, aclıq, sağlamlıq, təhsil, iqlim dəyişikliyi, gender bərabərliyi, su, sanitariya, enerji, ətraf mühit və sosial ədalət kimi geniş spektrli məsələləri əhatə edir.

Sülh, ədalət və səmərəli təsisatları ehtiva edən 16-cı Dayanıqlı İnkişaf Məqsədi dayanıqlı inkişaf naminə dinc və inklüziv cəmiyyətlərin təşviqinə, hər kəs üçün ədalətə çıxışın təmin edilməsinə və bütün səviyyələrdə təsisatların səmərəliliyini, hesabatlılığını və inklüzivliyi təmin etməyə çağırır.

Dinc cəmiyyət dedikdə, hər kəs üçün ədalətin və bərabərliyin təmin olunduğu cəmiyyət nəzərdə tutulur. Sülh dayanıqlı ətraf mühitin bərqərar olmasına, dayanıqlı ətraf mühit isə sülhün güclənməsinə xidmət edir.

Bu il Beynəlxalq Sülh Günü “Sülh hüququ: Ümumdünya İnsan Hüquqları Bəyannaməsinin 70-ci ili” devizi altında keçirilir. Bu deviz insan hüquqları tarixinin dönüş nöqtəsi olan Ümumdünya İnsan Hüquqları Bəyannaməsinin 70-ci ildönümünə həsr olunub.

Ümumdünya İnsan Hüquqları Bəyannaməsi dünyada ən çox dilə tərcümə olunan sənəddir. 500-dən artıq dildə mövcud olan bu sənəd qəbul olunduğu gündən bu günə qədər aktuallığını qoruyub saxlayır.

BMT-nin Baş Katibi Antonio Quterreşin Beynəlxalq Sülh Günü ilə bağlı müraciətində qeyd etdiyi kimi, “indi bütün ölkələrin və xalqların Ümumdünya İnsan Hüquqları Bəyannaməsinin amallarını gerçəkləşdirməsi vaxtıdır. Bu Bəyannamə bəşər ailəsinin bütün üzvlərinə xas olan ləyaqəti və onların bərabər və ayrılmaz hüquqlarını qəbul edir.”

O, hər kəsi gender bərabərliyini, inklüziv cəmiyyətləri, iqlim dəyişikliyə qarşı mübarizəni dəstəkləməyə və hamı üçün əbədi sülh naminə hər kəsin insan hüquqlarını müdafiə və təşviq etməyə səslədi.

Bu gün Beynəlxalq Sülh Gününə həsr olunmuş sərgini və uşaqların çəkdiyi rəsmləri görməyi səbirsizliklə gözləyirəm. Sülhə uşaqların gözü ilə baxmaq hər zaman maraqlıdır. Kim bilir, bəlkə də  dünyada sülhə nail olmaq üçün ən yaxşı yolun nə olduğunu onlar bizə deyə bilər.

Beləliklə, gəlin, birlikdə təhlükəsiz, ədalətli və çiçəklənən gələcək üçün çalışaq!