BMT-nin Rezident Əlaqələndiricisi Qulam M. İshaqzainin XIX Beynəlxalq Gənclər Forumunda çıxışı

Xanımlar və cənablar,

Əziz gənc iştirakçılar,

Bu gün Azərbaycanda gənclər arasında könüllü qan donorluğunun inkişafına həsr olunmuş 19-cu Beynəlxalq Gənclər Forumunda çıxış etmək mənim üçün böyük zövqdür.

Forumun təşkilinə və tədbir iştirakçıları qarşısında çıxış etmək imkanı yaratdığına görə Səhiyyə Nazirliyinin İctimai Səhiyyə və İslahatlar Mərkəzinə və onun tərəfdaşlarına təşəkkürümü bildirmək istəyirəm.

Bu cür forumlar könüllü donorluğun faydaları haqqında məlumatlılığı artırmaq və qanvermə ilə bağlı mənfi təsəvvürü və mifləri aradan qaldırmaq üçün vacib bir platforma təmin edir.

İcazənizlə, qan donorluğunun bir neçə faydasını qeyd etmək istərdim.

Birincisi, könüllü qan donorluğunun ən təmiz və ən yaxşı könüllülük formalarından biri olduğunu qəbul etməliyik.

Bu, sanki bir hissəmizi başqalarının xidmətinə verdiyimiz nəcib bir hərəkətdir.

Bu hərəkət, qayğı və sosial həssaslığın sübutudur.

İkincisi, sağlam qana təhlükəsiz çıxış qadın və uşaqların sağlamlığı üçün çox vacibdir.

Könüllü donorlar ən təhlükəsiz qan mənbəyi hesab olunur.

Müntəzəm könüllü ianələr də təhlükəsiz qanın daha dayanıqlı təchizatını təmin edir.

Ümumdünya Səhiyyə Təşkilatının məlumatına görə, son onillikdə biz könüllü qan donorluğunda artımın şahidi olduq. Hazırda, 73 ölkə qan tədarükünün 90 faizindən çoxunu bu cür donorlardan toplayır.

Məmnuniyyətlə qeyd etmək istərdik ki, Azərbaycanda da bu tendensiya güclənir və hər il minlərlə gənc xüsusilə, Aşura günündə öz qanını verir və bu da həmin günü qeyd etmək üçün əla yoldur.

Bununla belə, daha çox irəliləmə tələb olunur, çünki hələ də 72 ölkə qan tədarükünün yarısından çoxunu pullu donorlardan və ya əvəzedici donorlardan toplayır, bu da təhlükəsizliyə, eləcə də qan və qan məhsullarının adekvat tədarükünə təsir göstərir.

Təhlükəsiz və keyfiyyətli qan və qan məhsullarının mövcud olmasını və onlara ehtiyacı olan bütün insanlar üçün lazımi şəkildə istifadəsini təmin etmək üçün könüllü və ödənişsiz qan donorları əsasında milli qan sistemlərinin inkişafı barəsində bir çox ölkələrə sahə siyasətləri üzrə istiqamət verən və texniki yardım göstərən Ümumdünya Səhiyyə Təşkilatının rolunu vurğulamaq istərdim.

Əziz gənclər,

Tarix boyunca ən böyük gənc nəslimiz bu gün yaşayır və bu, həyatın bütün sahələrində, o cümlədən səhiyyədə dəyişikliklər üçün güclü qüvvədir.

İndiki 1,8 milyardlıq nəsil sağlamlıq sisteminin bütün bölmələrinə böyük təsir göstərir.

Gənclərin bizi daha sağlam bir gələcəyə apara biləcəyinə inanırıq, çünki:

– Onlar gənclər üçün əlverişli cinsi və reproduktiv sağlamlıq xidmətlərinin yaradılmasının, eləcə də məcburiyyət, ayrı-seçkilik və zorakılıqdan azad olmağı təşviq edə bilərlər.

– Onlar müsbət sosial dəyişiklikləri irəlilətmək, icma və ölkələrinin sağlamlıqla bağlı cari və gələcək ehtiyaclarının ödənilməsinə yönəlmiş siyasət və prosedurlara təsir etmək üçün cəmiyyətin bütün səviyyələrində fəal iştirak edə bilərlər.

Bu gün dünya, gənclərin dayanıqlı inkişafda olan rolunu və iştirakını daha çox tanıyır.

Ötən ilin sentyabrında Birləşmiş Millətlər Təşkilatı “2030 Gənclər strategiyası: Gənclərlə birgə və Gənclər üçün İş” adlı gənclər strategiyasını həyata keçirməyə başladı.

Bu strategiya gənclərin tanınmasını və faydalı iştirakını özündə birləşdirir, eləcə də dayanıqlı sülhə əhəmiyyətli töhfə üçün qapı açır.

Strategiya, dayanıqlı sülh; iqlim dəyişikliyi; yoxsulluq səviyyəsinin azaldılması; xəstəliklərə və savadsızlığa qarşı mübarizə kimi əsas məsələlərə diqqət yetirərək, DİM-lərə nail olunmasına töhfə verir.

Azərbaycanda da gənclərin cəmiyyətdə mənalı iştirakını təmin etmək üçün onlarla yaxından çalışırıq.

UNİCEF, BMT-nin Əhali Fondu, ÜST və BMTİP kimi BMT agentlikləri, hökumət tərəfdaşları ilə birlikdə gənclərin bacarıqlarının inkişafı, yeniyetmələrin sağlamlığı, eləcə də gənclərin məşğulluğu və idmana dəstək vermək üçün çalışırlar.

BMT Azərbaycanda, təşkilatın yerlərdəki proqramları və fəaliyyətləri barədə məlumat verən və bu təşəbbüslərin gənclərə müvafiq olmasını təmin edən Gənclərdən ibarət Məşvərət Şurasını yaradıb.

Gənclər Dayanıqlı İnkişaf Məqsədlərinin (DİM) təbliğatında fəal iştirak edirlər. Məqsədləri tanıtmaq üçün 17 DİM gənc səfir təyin etmişik.

Sonda əminəm ki, bu hadisə gənclərin könüllü qan bağışlamasına müsbət münasibətin artmasına öz töhfəsini verəcək.

Bir daha təşkilatçılara təşəkkür edir və sizə uğurlu Forum arzulayıram.

Çox sağ olun!