REACT-C19 layihəsi COVID-19-a qarşı mübarizə tədbirlərini gücləndirməkdə Azərbaycanı dəstəkləməyə davam edir

“Bu müddət ərzində REACT-C19 heyəti seçilmiş xəstəxanalardakı mövcud vəziyyəti qiymətləndirmiş və boşluqların aradan qaldırılmasında xəstəxanalara dəstək olmuşdur. Xəstəxanaların rəhbərliklərinə və işçilərinə bu prosesdə göstərdikləri misilsiz xidmət üçün, həkimlərimizə isə verdikləri əvəzsiz töhfələrə görə təşəkkür edirik,” ÜST-nin Azərbaycandakı nümayəndəsi Dr Hande Harmancı açılış nitqində bildirib.

“Azərbaycan Respublikasının Prezidenti, Zati-aliləri cənab İlham Əliyevin pandemiyanı məğlub etmək üçün bütün resursların səfərbər edilməsinə səbəb olan “Biz birlikdə güclüyük” müraciəti, dünya ictimaiyyətinə koronavirus pandemiyası ilə vahid mübarizədə həmrəylik nümayiş etdirmək üçün şüar olmalıdır. REACT – C19 layihəsi həmrəyliyimizi göstərmək, bu çətinliyin öhdəsindən gəlmək və bütün səyləri səfərbər etmək üçün beynəlxalq tərəfdaşlığın ən yaxşı nümunəsidir,” Heydər Əliyev Fondunun nümayəndəsi Soltan Məmmədov öz çıxışında bildirib.

“REACT-C19 layihəsinin ikinci mərhələsi uğurla yekunlaşdı, hazırda növbəti mərhələdəyik. Əminəm ki, Türkiyədən gələn soydaşlarımızın pandemiya dövründə ölkəmizdəki həmkarlarına dəstəyi çox müsbət nəticələr verəcək və biz az itki ilə koronavirusa qarşı mübarizəni başa çatdıracağıq”, TƏBİB-in İdarə Heyətinin sədrinin müşaviri Şəhriyar Fətullayev qeyd edib. 

REACT-C19 heyətinin fəaliyyəti 

Bakıdakı 4 xəstəxanada (Mərkəzi Neftçilər Xəstəxanası, Yeni Klinika, ATU Tədris Terapevtik Klinikası, ATU Tədris Cərrahiyyə Klinikası) işlərini yekunlaşdırdıqdan sonra həkimlər 4 bölgəyə – Gəncə, Ağdaş, Goranboy və Şəmkirə yola düşüblər.  

ÜST-nin Xəstəxana Hazırlıq Siyahısından istifadə edərək seçilmiş xəstəxanalarda mövcud vəziyyəti dəyərləndiriblər, problemlərin aradan qaldırılmasına dəstək olublar, eləcə də xəstəxanaların hazırlıq səviyyəsini artırmaq üçün orada çalışan həkimlərlə birgə fəaliyyət planı üzərində işləyiblər. Standart qiymətləndirmə alətinin istifadəsi tibb işçilərinin gündəlik fəaliyyətlərində işlərinin daha səmərəli aparılmasına yardımçı olub.

Həkim-mütəxəssislər infeksiyanın qarşısının alınması və nəzarət komitələrinin yaradılması və gücləndirilməsi, eləcə də triaj sistemlərinin qurulması üzərində çalışıblar. Bu tədbirlər infeksiyanın tibb işçilərinə, xəstələrə və ailələrə yayılmasını minimuma endirmək üçün vacibdir.

Bu müddət ərzində həkimlər, tibb bacıları və xəstəxanalardakı köməkçi heyət də daxil olmaqla 400-dən çox tibb işçisi REACT-C19 həkimlərinin keçirdiyi təlimlərdə iştirak edib. 

Onlar təlimlərin keçirilməsi və standartların yaradılması ilə yanaşı, ağır xəstələrin müalicəsinə dair öz bilik və təcrübələrini yerli həkimlərlə bölüşüblər. 

REACT-C19 heyəti iyun ayının sonunadək Azərbaycanın müxtəlif bölgələrində fəaliyyətini davam etdirəcək.

REACT-C19 layihəsi haqqında 

REACT-C19 layihəsi Heydər Əliyev Fondu, Səhiyyə Nazirliyi, İcbari Tibbi Sığorta üzrə Dövlət Agentliyi, TƏBİB, USAID, Böyük Britaniyanın Azərbaycandakı Səfirliyi və Koreya Respublikası ilə birgə əməkdaşlıq çərçivəsində Ümumdünya Səhiyyə Təşkilatı tərəfindən Azərbaycanda COVID-19-a qarşı xəstəxanalarda əsas bacarıqları artırmaq məqsədilə həyata keçirilir. Hal-hazırda Türkiyədə yoluxucu xəstəliklər, pulmonologiya, anesteziologiya və reanimasiya, daxili orqanların xəstəlikləri üzrə işləyən 19 həkim REACT-C19 heyətində təmsil olunurlar.