FAO və KTN Azərbaycanda fındıqçılığın inkişafı ilə bağlı beynəlxalq konfransa ev sahibliyi edib

BMT-nin Ərzaq və Kənd Təsərrüfatı Təşkilatının (FAO) Azərbaycandakı Tərəfdaşlıq və Əlaqələndirmə Ofisinin Azərbaycan Respublikasının Kənd Təsərrüfatı Nazirliyi (KTN) ilə birgə icra etdiyi “Azərbaycanda fındıqçılıq sahəsində səmərəliliyin və dayanıqlılığın sürətləndirilməsi – HAZER” layihəsi çərçivəsində “Fındıq potensialının artırılması: Məhsuldarlıq, keyfiyyət və ixrac həcminin artırılması innovativ yanaşmalar” mövzusunda beynəlxalq konfrans təşkil edib.

Konfransın məqsədi fındıqçılıq sektorunda qlobal təcrübələri bölüşmək, yenilikləri araşdırmaq və  maraqlı tərəfləri bir araya gətirərək bir platforma təqdim etmək olmuşdur. Bu konfransda təqdim olunan fikirlər və əldə edilmiş nəticələr sektorun mümkün inkişafı üçün vacib bir təməl olacağı əsas hədəflər sırasındadır.

15 noyabrda keçirilən tədbirdə Kənd Təsərrüfatı Nazirliyi və digər dövlət qurumlarının, həmçinin beynəlxalq və özəl sektorun nümayəndələri, yerli və beynəlxalq mütəxəssislər də iştirak edib.

Hibrid formatda keçirilən tədbirin əvvəlində açılış nitqi ilə çıxış edən cənab Azad Cəfərli aqrar inkişaf sahəsində dövlətin dəstəyini bildirərək “bölgələrdə əhalinin məşğulluğunun artırılmasına və yoxsulluq səviyyəsinin azaldılmasına etibarlı zəmin yaratmasını” vurğulayıb. Bundan sonra illər üzrə müqayisəli təhlildən danışan KTN Aparatının rəhbəri “2022-ci ildə fındıq bağlarının sahəsi 2015-ci ilə nisbətən 2.5 dəfə, 2021-ci ilə nisbətən 1.4% artıb” deyə bildirib. Cənab Azad Cəfərli FAO ilə əməkdaşlıq çərçivəsində həyata keçirilmiş fəaliyyətləri vurğulayaraq, “aqrar siyasətin qarşıya qoyduğu məqsədlərin bu istiqamətdə müsbət nəticələr verəcəyinə əminliyini” qeyd edib.

Öz növbəsində açılış nitqi ilə çıxış edən FAO-nun Azərbaycandakı nümayəndəsinin müavini cənab Bariz Mehdiyev FAO-nun Azərbaycandakı fəaliyyətinə - ərzaq təhlükəsizliyinin təmin edilməsi, dayanıqlı kənd təsərrüfatı və ərzaq sistemlərinin inkişafı və digər sahələrə toxunaraq, hökümətlə əməkdaşlıqdan söz açıb. “Fındıq məhsulunun ixrac yönümlü və ölkə iqtisadiyyatına əsas gəlir gətirən mənbələrindəndir”, deyə bildirən cənab müavin, fındıq istehsalının effektivliyini artırmaq və istehsal edilmiş fındığın keyfiyyətini yüksəltmək üçün layihənin başlanmasının KTN ilə 2020-ci ildə qərarlaşdırıldığını bildirib. Aflatoksin maddəsinin fındığın tərkibindən çıxarılmaqla keyfiyyətinin dünya bazarı tələbatına uyğunlaşdırılması və dron və peyk vasitəsilə fındıq bağlarının xəritəsini hazırlanması və başqa uğurların layihə çərçivəsində əldə olunmasını qeyd edib. 2022–2026-cı illərdə sosial-iqtisadi inkişaf strategiyasında kənd təsərrüfatı sahəsinə əhəmiyyətli dərəcədə yer verilməsini bildirərək, Azad müəllimin nitqində bildirdiyi nailiyyətlərə söykənərk, KTN-nin əldə etdiyi uğurların FAO-nu da sevindirməsini vurğulayıb.

Dünyada fındıq bazarında baş verən cərəyanlardan söz açan məruzəçi mütəxəssislər fındıq sektorunun inkişafının ölkə iqtisadiyyatındakı əhəmiyyətindən, bundan savayı qarşısını alan maneələrdən söz açaraq təqdimatlarla çıxış ediblər.

Üç hissəli panel müzakirələrdən ibarət olan tədbirin ilk panel müzakirəsində “Fındıq istehsalı sektorunda təhlükələr və imkanlar, Azərbaycan nümunəsi”, ikinci panel müzakirədə “Dəyər zənciri üzrə innovasiyalar”, ən son panel müzakirəsində isə “Rəqabətli sektor üçün xidmətlərin göstərilməsi” barədə müzakirələr aparılaraq, tərəfdaşlar arasında fikir mübadiləsi, gələcək əməkdaşlıq perspektivləri danışılıb və fındıq sektorunun inkişafı ilə bağlı bir sıra məsələlərə toxunulub. Panel müzakirələrin sonunda FAO və KTN nümayəndələri yekun qeydlər və növbəti addımlar barədə çıxış edərək, konfransın bağlanış mərasimini həyata keçiriblər.

Konfransdan sonra xarici qonaqlara İçərişəhər turu təşkil olunub və şam yeməyi ilə gün yekunlaşıb.

Qeyd edək ki, HAZER layihəsinin icrası Azərbaycanda fındıqçılıq sektoruna dəstək olmaqla, bu sahənin beynəlxalq arenada Azərbaycanın fındıq məhsuluna olan diqqəti hədəf etməklə yerli dövlət qurumlarının dəstəyinə ehtiyacı bir daha önə çəkib.