Ümumdünya Səhiyyə Təşkilatı Səhiyyə Nazirliyi ilə əməkdaşlıqda gigiyena və epidemiologiya mərkəzlərinin təkmilləşdirilməsi sahəsində tədbirlər həyata keçirir

İyun və iyul aylarında ÜST-nin ictimai səhiyyə mütəxəssisləri RGEM və GEM-lərin institusional imkanlarının gücləndirilməsinə dəstək olmaq məqsədilə Səhiyyə Nazirliyi və RGEM nümayəndələri ilə görüşlər təşkil ediblər. Müəyyən olunmuş plana əsasən ÜST mütəxəssisləri RGEM-in müxtəlif şöbələri, Səbail, Sabunçu, Gəncə, Masallı və Astara GEM-lərinə səfər edərək qiymətləndirmələr aparıblar. 

13-14 iyulda bu istiqamətdə Səhiyyə Nazirliyi, RGEM və GEM nümayəndələri, İctimai Səhiyyə və İslahatlar Mərkəzi və ÜST mütəxəssislərinin iştirakı ilə iki günlük seminar baş tutub. Seminarın məqsədi təşkil olunmuş səfərin yekun nəticələrini təqdim etmək, RGEM və GEM-lərin SWOT təhlilini həyata keçirmək və ƏİSF üzrə potensialının qiymətləndirilməsi olub.

“Azərbaycanda pandemiyaya cavab tədbirləri” layihəsi çərçivəsində baş tutmuş seminar ölkədə ictimai səhiyyənin gücləndirilməsinə dəstək olmaq üçün təşkil olunmuşdur.