Ümumdünya Səhiyyə Təşkilatının Azərbaycanın ev sahibliyi ilə Avropa və Mərkəzi Asiyada xəstəxanaların gələcəyinə dair keçirdiyi  beynəlxalq görüş yekunlaşıb

İyunun 5-7-də  Ümumdünya Səhiyyə Təşkilatının (ÜST) Avropa üzrə Regional Ofisinin Səhiyyə Nazirliyi, İcbari Tibbi Sığorta üzrə Dövlət Agentliyi və Tibbi Ərazi Bölmələrini İdarəetmə Birliyi (TƏBİB) ilə birgə Bakıda xəstəxanaların gələcəyi ilə bağlı keçirdiyi yüksək səviyyəli regional görüşü işini yükunlaşdırıb. “Məqsədə uyğun xəstəxanalar: müasir səhiyyənin tələblərinə cavab vermək üçün keyfiyyət və davamlılığın prioritetləşdirilməsi” mövzusuna həsr olunan tədbir ÜST-nin Avropa Regionunda, xüsusən də Şərqi Avropa və Mərkəzi Asiyadakı xəstəxanaların üzləşdiyi başlıca çağırışları müzakirə etmək üçün 200-dən çox hökumət nümayəndəsini, xəstəxanaların tibb işçilərini və tərəfdaşları bir araya gətirib.

ABŞ Beynəlxalq İnkişaf Agentliyinin (USAID) ÜST-nin Azərbaycandakı Ölkə Ofisi ilə birgə həyata keçirilən layihə çərçivəsində dəstəklədiyi görüşün son günündə ilk iki gündə olduğu kimi, xəstəxanaların gələcəyini formalaşdıran mühüm mövzular üzrə dərin müzakirələrlə yadda qaldı. Azərbaycanda xəstəxanaların və səhiyyə sisteminin transformasiyasına həsr edilmiş üçüncü gündə Milli Məclisin və ölkənin səhiyyə qurumlarının təmsilçiləri bu sahədə son illər atılmış addımlar və əldə edilmiş nəticələri, eləcə də gələcəyə dair baxışlarını tədbir iştirakçıları ilə bölüşdülər. Həmçinin, ÜST-nin ölkənin səhiyyə sisteminin dəstəklənməsində əsas partnyorları sırasında olan USAID və Avropa İttiqanın Azərbaycandakı Nümayəndiliyinin iştirakı ilə birgə layihələr barəsində panel müzakirəsi baş tutdu.

Bundan əlavə, müzakirələrdə ilkin səhiyyə yönümlü sistemlərə doğru xəstəxana transformasiyasını istiqamətləndirmək, xəstə mərkəzli yanaşmanı və daha yaxşı xəstə nəticələrini təmin etmək üçün regional çərçivənin yaradılmasına diqqət yetirildi. Həmçinin üzv ölkələrdə xəstəxanaların transformasiyası ehtiyaclarının öyrənilməsi və həllərin dəstəklənməsində ÜST-nin rolunun müəyyənləşdirilməsi üzrə müzakirələr aparıldı.

ÜST xəstəxanaların gələcəyini birlikdə formalaşdırmağa davam etmək üçün üzv dövlətlər, tərəfdaşlar və maraqlı tərəflərlə əməkdaşlıq və birgə müzakirələrə davam edəcək.