Ümumdünya Səhiyyə Təşkilatı və Azərbaycan Avropa və Mərkəzi Asiya xəstəxanalarının gələcəyinə dair beynəlxalq görüş üçün səylərini birləşdirir

İyunun 5-7-də Ümumdünya Səhiyyə Təşkilatının (ÜST) Avropa üzrə Regional Ofisi Azərbaycan Respublikası Səhiyyə Nazirliyi, İcbari Tibbi Sığorta üzrə Dövlət Agentliyi və Tibbi Ərazi Bölmələrini İdarəetmə Birliyi (TƏBİB) ilə birgə Bakıda xəstəxanaların gələcəyi ilə bağlı yüksək səviyyəli regional görüşə ev sahibliyi edir. “Məqsədə uyğun xəstəxanalar: müasir səhiyyənin tələblərinə cavab vermək üçün keyfiyyət və davamlılığın prioritetləşdirilməsi” mövzusuna həsr olunan tədbir ÜST-nin Avropa Regionunda, xüsusən də Şərqi Avropa və Mərkəzi Asiyadakı xəstəxanaların üzləşdiyi başlıca çağırışları müzakirə etmək üçün 200-dən çox hökumət nümayəndəsini, xəstəxanaların tibb işçilərini və tərəfdaşları bir araya gətirir.

ABŞ Beynəlxalq İnkişaf Agentliyinin (USAID) ÜST-nin Azərbaycandakı Ölkə Ofisi ilə birgə həyata keçirdiyi layihə çərçivəsində dəstəklədiyi üç günlük tədbirdə xəstəxanaların üzləşdiyi çağırışlar və bu sahədə mövcud imkanlar, tibb müəssisələri üçün gələcək transformasiya, ekoloji cəhətdən dayanıqlı xəstəxanaların yaradılması, rəqəmsal transformasiya, insan resurslarının optimallaşdırılması, xəstəxanalara effektiv rəhbərlik və idarəetmə, eləcə də xəstəxana transformasiyasını ilkin səhiyyə yönümlü sistemlərə yönəltmək kimi bir çox mövzular müzakirə olunacaq.

Açılış nitqi ilə çıxış edən səhiyyə naziri Teymur Musayev beynəlxalq görüşün müasir dövr üçün mahiyyəti və məqsədlərinin aktuallığını yüksək qiymətləndirdi. Teymur Musayev bu il Azərbaycanda 100 illik yubileyi qeyd edilən xalqımızın ümummilli lideri Heydər Əliyevin ölkəmizin ÜST ilə uğurlu əməkdaşlığının əsasını qoyduğunu vurğuladı: “Milli səhiyyəmizin əldə etdiyi nailiyyətlərin əksəriyyəti üçün zəmin məhz Ulu Öndərin ölkəmizə rəhbərlik etdiyi dövrdə şəxsi iştirakı ilə həyata keçirilib”.

Teymur Musayev diqqətə çatdırdı ki, son 15 il ərzində Azərbaycan milli səhiyyə sisteminin infrastruktur, insan kapitalı və bu sahənin modernləşdirilməsi istiqamətində mühüm işlər görülüb: “Bu müddət ərzində müasir avadanlıqlarla təchiz edilmiş 700-dən çox tibb müəssisəsi tikilib və əsaslı təmir olunub. Peşəkar tibbi kadr potensialının formalaşdırılması və inkişafında mühüm nailiyyətlər əldə edilib, Azərbaycan Tibb Universitetinin tədris planı beynəlxalq standartlara uyğunlaşdırılıb. Eyni zamanda, müalicə-profilaktik mərkəzlərində vətəndaş amili prioritet məqsədə çevrilməklə səhiyyənin paradiqmasını yenidən qiymətləndirmək üçün böyük imkanlar yarandı. Artıq ilkin mərhələ uğurlu nəticələrlə həyata keçirilməkdədir”.

“Tədbir dünyada ilkin səhiyyə xidmətlərinin gücləndirilməsinə xüsusi ehtiyac olduğu bir vaxtda keçirilir. İlkin səhiyyə, stasionar və ambulator müalicələr üçün davamlı və sürətli vahid rəqəmsal platformaya transformasiya, səhiyyə sistemlərində müasir menecmentin tətbiqi olduqca aktualdır. Bugünkü tədbir səhiyyə sistemlərinin gələcək ictimai sağlamlıq məsələləri üçün funksionallığının hazırlanmasında mühüm addım olacaq”, - deyə nazir fikrini tamamladı.

TƏBİB-in icraçı direktoru Dr. Vüqar Qurbanov öz çıxışında xəstəxanaların səhiyyədə mühüm rolundan söz açaraq qeyd etdi ki, xəstəxanaların fəaliyyətini dəyişən tələblərə uyğunlaşdırmaq istiqamətində davamlı işlər görülür. Lakin bununla yanaşı xəstəxana sektorunda əsas problemlərin aradan qaldırılması, idarəetmənin təkmilləşdirilməsi ehtiyaclarını müəyyən etməyin vacibliyini də diqqətə çatdırdı.

Dr. Vüqar Qurbanovun sözlərinə görə: “Xəstəxanada davamlı öyrənmə və innovasiyanı dəstəkləyən mühitin yaradılması,  tibb işçiləri arasında pasiyentə müasir qayğı metodlarını aşılamaq, eləcə də xəstəxana işçilərinin sağlamlığını və rifahını təmin etmək istiqamətində üzərimizə birgə məsuliyyət düşür”. Onun sözlərinə görə hazırda xəstəxanaların fəaliyyət göstərmə üsulunun təkmilləşdirilməsi istiqamətində işlər görülür və mövcud proseslərin və sistemlərin məqsədlərimizə uyğun şəkildə effektiv işləməsini təmin etməyə xüsusi diqqət yetirilir. “Bu, özündə yeni texnologiyaların tətbiqini, yeni maliyyələşmə mexanizmlərinin müəyyən olunmasını, infrastrukturun təkmilləşdirilməsini, işçi heyəti üçün iş yükünün azaldılması və resurslardan səmərəli istifadəni əhatə edir” deyə Dr. Vüqar Qurbanov bildirib. Eyni zamanda xəstəxanalarda ictimai səhiyyəyə yeni yanaşmaların həyata keçirilməsi, ilkin səhiyyə xidmətinin təkmilləşdirilməsi istiqamətində ardıcıl fəaliyyət təmin edilməsini öz çıxışında vurğulayıb. “Hesab edirəm ki, bu yüksək səviyyəli görüş bizə strategiyamızın yeni konturlarını müəyyən etməyə imkan verəcək” sözləri ilə Dr. Vüqar Qurbanov çıxışını tamamladı.

Daha sonra çıxış edən ÜST-nin Avropa üzrə Regional Ofisinin Ölkə Səhiyyə Siyasəti və Sistemləri Departamentinin Direktoru Dr. Nataşa Azzopardi Muskat hər bir xəstəxananın xüsusi və unikal olduğunu diqqətə çatdırıb: “Xəstəxana bizim üçün sadəcə xidmət göstərilən bina deyil. Xəstəxana aid olduğu cəmiyyətin bir hissəsidir. Bura insanların hər gün gəldiyi iş yeridir. Bura ailələrin yaxınlarının sağalacağına, özünü daha yaxşı hiss edəcəyinə ümid edərək gəldiyi məkandır. Bütün bunlarla yanaşı, xəstəxanalar Avropa regionunda səhiyyə sisteminin transformasiyasının əsas hərəkətverici qüvvəsi rolunu oynayır. Biz ÜST-nin Avropa üzrə Regional Ofisi olaraq Səhiyyə Nazirliyi və Azərbaycandakı digər tərəfdaşlarımızla birgə Bakıda bu tədbirə ev sahibliyi etdiyimizə görə qürur hissi duyur və səbirsizliklə bu mühüm gündəmi daha da inkişaf etdirməyi gözləyirik”.

ÜST-nin Azərbaycandakı nümayəndəsi və Ölkə Ofisinin rəhbəri Dr. Hande Harmancı isə öz çıxışında xəstəxanalar sahəsində transformativ dəyişikliyin əhəmiyyətini vurğulayıb: “Xəstəxanalar səhiyyə sisteminin ayrılmaz tərkib hissəsidir və bizim xəstəxanaların problemlərini həll etməyə yönələn səylərimiz, habelə inkişaf imkanlarına dəstəyimiz olduqca vacibdir. Bu görüş də öz növbəsində Avropadakı xəstəxanaların gələcəyini birgə formalaşdırmaq üçün ekspertləri və maraqlı tərəfləri bir araya gətirməkdə platforma rolunu oynayır."

Tədbirin son günü Azərbaycanın səhiyyə sisteminə həsr olunacaq. Belə ki, müzakirələrdə əsas diqqət ölkənin bu sahədəki xüsusi ehtiyaclarının müəyyənləşdirilməsinə və dəstəyin, həll yollarının göstərilməsində ÜST-nin rolunun müəyyənləşdirilməsinə yönəldiləcək. Bu sessiya yerli və beynəlxalq iştirakçıların, həmçinin ÜST ekspertlərinin fəal iştirakı ilə baş tutacaq, eyni zamanda xəstəxanalar sahəsində ölkənin səhiyyə ehtiyaclarının həllinə hərtərəfli və birgə yanaşmanı təmin edəcək.

Bu yüksək səviyyəli regional görüş Avropada xəstəxanaların üzləşdiyi əsas problemlərin həllində irəliyə doğru atılmış mühüm addımdır. Genişmiqyaslı müzakirələr, uğurlu təcrübələrin bölüşülməsi və həmin praktikadan istifadə vasitəsilə tədbir keyfiyyət, davamlılıq və müasir xəstəxanaların artan tələblərinə və onların ehtiyac duyduğu transformativ dəyişikliyə üstünlük verən strategiyaların və həllərin müəyyənləşdirilməsinə töhfə verəcək.

Tədbiri onlayn izləmək üçün keçid:

Azərbaycan dilində: https://www.youtube.com/watch?v=SRSMB1tKUdk

İngilis dilində: https://www.youtube.com/watch?v=8FU0yYV5Zys