USAID və ÜST insanlara həyat xilas edən ürək masajı bacarıqları öyrətmək üçün tədbirlər silsiləsinə başlayıb

USAID və ÜST insanlara həyat xilas edən ürək masajı bacarıqları öyrətmək üçün tədbirlər silsiləsinə başlayıb 

Kardiopulmonar resusitasiya (KPR) və ya ürək masajı qəfil ürək dayanması zamanı həyat xilas etmək üçün ilk və ən önəmli addımlardandır. Tədqiqatlar göstərir ki, bu zaman ürək masajı edilmədən keçən hər dəqiqə sağ qalma ehtimalı təxminən 10% azalır. Digər tərəfdən, ürək dayanmasından dərhal sonra sadəcə əllərlə edilən ürək masajı sağ qalma ehtimalını 2-3 dəfə artıra bilir. 

Ürək masajı edə bilmək üçün tibb işçi olmaq mütləq deyil və hər kəs, o cümlədən 12 yaşdan yuxarı uşaqlar bu həyat qurtaran bacarığa yiyələnə bilər. Ürək masajı bacarıqlarının öyrənilməsini vacibliyini təbliğ etmək üçün Ümumdünya Səhiyyə Təşkilatının (ÜST) Azərbaycan Nümayəndəliyi “Əllərimdə həyat var!” adlı ictimai maarifləndirmə tədbirləri və təlimlər silsiləsinə start verib. 

9 mayda “Gənclik Mall” ticarət mərkəzində baş tutan tədbir zamanı ziyarətçilər ürək masajı öyrənməyin əhəmiyyəti haqqında məlumatlandırılıb və 122 nəfər mütəxəssislərin nəzarətilə xüsusi maneken üzərində ürək masajı tətbiq edərək öyrənmək imkanı əldə edib. 

Daha öncə 6 mayda “Park Bulvar” ticarət mərkəzində keçirilən oxşar tədbir zamanı isə ümumilikdə 108 nəfər ürək masajı bacarıqlarına yiyələnib. Bu silsilədən növbəti tədbir 11 may saat 17:00-19:00-da “28 Mall”da keçiriləcək.  

Tədbirlər silsiləsi Amerika Birləşmiş Ştatları Beynəlxalq İnkişaf Agentliyinin (USAID) dəstəyilə ilə ÜST Azərbaycan Nümayəndəliyinin Azərbaycan Respublikası Səhiyyə Nazirliyi, İcbari Tibbi Sığorta üzrə Dövlət Agentliyi və TƏBİB-lə əməkdaşlıqda həyata keçirdiyi“Azərbaycanda pandemiyaya cavab tədbirləri” layihəsinin bir hissəsidir.