Yaponiyanın “Fuji Optical” şirkəti pandemiya ilə əlaqədar məhdudiyyətlər səbəbindən yaranan üç illik fasilədən sonra BMT QAK vasitəsilə Azərbaycana humanitar missiyalarını bərpa edir

BMT-nin Qaçqın Agentliyi (BMT QAK) Yaponiyanın “Fuji Optical” şirkətinin Azərbaycana həssas qrupdan olan insanlara göz müayinəsi xidmətləri göstərmək məqsədi ilə 16-cı humanitar missiyasını təşkil edir. Azərbaycan Respublikasının Qaçqınların və Məcburi Köçkünlərin İşləri üzrə Dövlət Komitəsinin dəstəyi ilə altı nəfər Yapon optometrist mütəxəssisdən ibarət heyət 9-13 may 2023-cü il tarixlərdə Füzuli rayonunda və 15 may tarixdə Bakı şəhərində təqribən 2500 məcburi köçkün, qaçqın, sığınacaq axtaran və digər həssas qruplardan olan şəxsin göz müayinəsindən keçməsini təmin edəcəkdir. Onlar, həmçinin ehtiyacı olan şəxslərə ödənişsiz olaraq eynək paylanışını həyata keçirəcəklər.

“Fuji Optical” şirkəti 1983-cü ildən dünyanın bir çox ölkələrinə, 2005-ci ildən etibarən isə Azərbaycana ixtisaslaşmış humanitar yardım göstərməsi sayəsində BMT QAK-ın ən uzunmüddətli korporativ tərəfdaşıdır. Şirkət indiyədək Azərbaycana 70 mindən artıq eynək ianə edib və ölkəyə gətirilən görmə və eşitmə vasitələrinin toplam dəyəri 2,58 milyon ABŞ dollarını ötüb.

Baxmayaraq ki “Fuji Optical” Azərbaycana hər il etdiyi humanitar missiyalarını COVİD-19 pandemiyası səbəbindən 2020-ci ildə dayandırmalı oldu, şirkət BMT QAK vasitəsi ilə yüksək keyfiyyətli eynək və eşitmə aparatlarının ianəsini son üç ildə də davam etdirib. BMT QAK öz tərəfdaşları ilə əməkdaşlıq şəraitində həmin görmə və eşitmə vasitələrinin Azərbaycanın münaqişədən ziyan çəkmiş ərazilərində, o cümlədən Ağdam və Tərtər rayonlarında məcburi köçkünlərə və digər həssas qruplardan olan insanlara paylanışını təşkil edib. “Fuji Optical” şirkətinin İdarə Heyətinin sədri və baş icraçı direktoru Dr. Akio Kanai, illər ərzində davamlı və fədakar humanitar səylərinə görə 2006-cı ildə Nansen Qaçqın Mükafatına layiq görülüb və aldığı mükafat məbləğini BMT QAK-a bağışlayıb. Həmin vəsait 2007-ci ildə Beyləqan rayonunda müvəqqəti məskunlaşmış Xocavənd məcburi köçkün icmasının su təchizatı layihəsinin maliyyələşdirilməsinə sərf edilib.

Bundan əlavə, Dr. Kanai 2017-ci ildə Yaponiyanın "Yomiuri" qəzetinin nüfuzlu "Yomiuri Şimbun Beynəlxalq Əməkdaşlıq" mükafatını almış və mükafat məbləği olan 5 milyon yen (qırx dörd min ABŞ dolları ekvivalenti) pulu 2018-ci ildə Azərbaycan Respublikasının Məcburi Köçkünlərin Sosial İnkişaf Fonduna bağışlayıb. Fond isə həmin vəsaitlə Cəbrayıl rayonunun Cocuq Mərcanlı kəndinə qayıdan məcburi köçkünlərin istifadəsi üçün kənd təsərrüfatı texnikası alıb. BMT QAK bütün dünyada qaçqınların və digər zorla didərgin salınan insanların və vətəndaşlığı olmayan şəxslərin himayəsi və onlar üçün davamlı həll yollarının tapılması məqsədi ilə yerli hakimiyyət orqanları ilə əməkdaşlıq şəraitində beynəlxalq səylərə rəhbərlik etmək və onları koordinasiya etmək mandatına sahibdir. BMT QAK Azərbaycanda 1992-ci ilin dekabrından, ölkə kütləvi didərgin axını problemi ilə üzləşdiyi vaxtdan fəaliyyət göstərir