Münaqişənin təsirinə məruz qalmış bölgələrdə ailə həkimləri üçün psixi sağlamlıq xidmətlərinin təminatı ilə bağlı superviziyalar təşkil olunub 

Avropa İttifaqı (Aİ) tərəfindən maliyyələşdirilən və Ümumdünya Səhiyyə Təşkilatının (ÜST) Azərbaycandakı Ölkə Ofisi tərəfindən həyata keçirilən “Psixi Sağlamlıq Xidmətlərinin Münaqişədən Sonrakı Dövrdə Koordinasiyası və Transformasiyası” layihəsi çərçivəsində Ölkə Ofisinin nümayəndə heyəti Bərdə, Ağcabədi və Ağdam rayonlarına səfər edib. Səfərin məqsədi bu bölgələrdə ilkin səhiyyə xidməti göstərən və daha əvvəl əhali arasında ən çox rast gəlinən psixi sağlamlıq problemlərinin müəyyənləşdirilməsi və onlara cavab verilməsi üzrə ÜST-nin təlimlərini keçmiş həkimlərlə birlikdə superviziyalarda iştirak etmək olub. 

Səfər eyni zamanda ÜST ilə hökumət və yerli səhiyyə qurumları arasında əməkdaşlığın gücləndirilməsi baxımından məhsuldar keçib. Sözügedən səfər çərçivəsində ÜST-nin Azərbaycandakı nümayəndəsi və Ölkə Ofisinin rəhbəri Dr. Hande Harmancı ÜST-nin layihə qrupu və Tibbi Ərazi Bölmələrini İdarəetmə Birliyinin (TƏBİB) nümayəndələri ilə birlikdə Ağdam Rayon Mərkəzi Xəstəxanasının direktoru Dr. Rövşən Əhmədov ilə görüşüb və ilkin tibbi yardım xidməti göstərən həkimlər ilə söhbət edib.  

ÜST-nin nümayəndə heyəti daha sonra Ağdam Rayonlararası Ruhi Əsəb Dispanserinə baş çəkib. Dispanserin direktoru Dr. Emin Süleymanov Ağdam və Ağcabədi, Beyləqan, Füzuli, İmişli, Laçın kimi bir sıra ətraf rayonların 1 milyona yaxın əhalisinə psixi sağlamlıq xidməti göstərdiklərini bildirib. Dr. Süleymanov həmçinin ÜST-nin təşəbbüsü ilə icma səviyyəsində psixi sağlamlıq xidmətinin sosial işçilər tərəfindən göstərilməsinin də müsbət təsirlərini qeyd edib. Daha sonra nümayəndə heyətini Ağdam Rayon İcra Hakimiyyətinin başçısı Vaqif Həsənov qəbul edib. O, layihəni yüksək qiymətləndirərək, bu kimi xidmətlərin gücləndirilməsinin vacibliyini vurğulayıb.  

“Psixi Sağlamlıq Xidmətlərinin Münaqişədən Sonrakı Dövrdə Koordinasiyası və Transformasiyası” layihəsi psixi sağlamlıq xidmətlərinin ilkin səhiyyə səviyyəsində təkmilləşdirilməsi məqsədilə ÜST-nin Azərbaycan Ölkə Ofisi tərəfindən Avropa İttifaqının maliyyə dəstəyi ilə həyata keçirilir.   

Layihənin məqsədi Azərbaycanda psixi sağlamlıq və psixo-sosial dəstək (sahəsinin inkişafı üçün multidisiplinar koordinasiya mexanizminin yaradılmasına kömək etmək və ilkin səhiyyə xidməti göstərən müəssisələrdə psixi sağlamlıq xidmətinin göstərilməsi üçün potensialın formalaşdırılmasıdır. Bu layihə keçmiş təmas xətti boyunca yerləşən 5 rayonu - Ağdam, Ağcabədi, Bərdə, Füzuli və Tərtəri əhatə edir və Aİ ilə ÜST-nin Azərbaycana olan davamlı dəstəyinin tərkib hissəsidir.