ÜST və UNICEF Qobustan, Mİngəçevir, Yevlax və Göygöldə peyvənddən kənarda qalan yüzlərlə uşağın valideyni üçün maarifləndirmə kampaniyası keçirib 

Avropa İttifaqının maliyyə dəstəyi ilə Ümumdünya Səhiyyə Təşkilatı (ÜST) və BMT-nin Uşaq Fondu (UNICEF) 24-29 aprel  - Avropa İmmunlaşdırma Həftəsində peyvəndlərlə əhatə dairəsi aşağı olan 4 rayonda maarifləndirmə xarakterli silsilə tədbirlər təşkil edib. Belə ki, immunlaşdırma kampaniyası çərçivəsində bu rayonlarda təxminən 150 nəfərə yaxın pediatr və vaksinator üçün təlimlər, həmçinin uşaqlarına peyvənd vurdurmaqla bağlı tərəddüd edən təxminən 500 valideynin iştirakı ilə Valideyn Konfransları  keçirilib.  

ÜST və UNICEF tərəfindən Azərbaycan Respublikası Səhiyyə Nazirliyi, Tibbi Ərazi Bölmələrini İdarəetmə Birliyi (TƏBİB) və İcbari Tibbi Sığorta üzrə Dövlət Agentliyinin birgə əməkdaşlığı ilə baş tutan tədbirlər “Peyvəndin vaxtını gecikdirmə! Hər doza vacibdir!” şüarı altında təşkil edilib.  

Kampaniya çərçivəsində Qobustan, Yevlax, Mingəçevir və Göygöl rayonlarında Valideyn Konfransları baş tutub. Göygöl və Mingəçevir rayonunda keçirilən  Valideyn Konfransında Azərbaycan Tibb Universitetinin dosenti, Səhiyyə Nazirliyinin mütəxəssis-eksperti  Nigar Bayramova və pediatr- infeksionist Aytən Ziyadova valideynlərin peyvəndə bağlı suallarını cavablandırıb. Bu konfranslar zamanı valideynlərə uşaqların vaxtında peyvənd olunmasının əhəmiyyəti haqqında məlumat verildikdən sonra peyvəndləmədən kənarda qalan xeyli sayda uşaq yerindəcə peyvənd olunub. 

Eyni zamanda həkim N. Bayramova tərəfindən Yevlax və Göygöl rayonunda, A.Ziyadova tərəfindən isə Qobustan və Mingəçevir rayonunda fəaliyyət göstərən 150-ə yaxın pediatrlar və vaksinatorlar üçün peyvəndlə bağlı elmi sübutlara əsaslanan son yeniliklər haqqında təlim keçirilib.  

İmmunlaşdırma Həftəsi ərzində Göygöl Rayonunda təşkil edilmiş sonuncu tədbirdə ÜST-nin Azərbaycandakı nümayəndəsi və ölkə ofisinin rəhbəri Dr. Hande Harmancı və rayon rəsmiləri iştirak ediblər. Göygöl Rayon Mərkəzi Xəstəxanasının direktoru Vasif Əliyev immunlaşdırma kampaniyası ilə bağlı öz fikirlərini belə ifadə edib: “ÜST-nin ən ucqar kəndlərimiz də daxil olmaqla Göygöl rayonunda olan bütün vaksinasiya məntəqələrində immunlaşdırma kampaniyasının keçirilməsi üçün göstərdiyi səyləri yüksək qiymətləndiririk. Ümidvaram ki, bu kampaniyanın nəticəsi olaraq, bizim regionun peyvəndlərlə əhatə səviyyəsində irəliləyiş əldə edəcəyik. Çünki valideynlərlə keçirilən görüşlər və paylanılan maarifləndirici materiallar çox faydalı oldu. Bilirəm ki, peyvəndlə bağlı bir çox yanlış təsəvvür aradan qalxdı”. 

“Biz valideyn olaraq uşaqlarımızı qorumaq üçün əlimizdən gələn hər şeyi edirik. Uşaqlarımıza bütün lazımi peyvəndləri vaxtında vurdurmağımız onları qorumaq üçün edə biləcəyimiz ən yaxşı addımdır. Ümid edirəm ki, immunlaşdırma kampaniyası bu mesajı bütün ailələrə çatdırmağa kömək edir. Biz bütün tərəfdaşlarımızla birlikdə dövrümüzün ən vacib insan həyatını xilas edən vasitə hesab olunan peyvəndləri təbliğ etməyə davam edəcəyik” -  Dr. Harmancı bildirib. 

Qeyd edək ki, kampaniya müddəti boyunca əhali arasında maarifləndirməni gücləndirmək məqsədi ilə sözügedən rayonlarda bütün vaksinasiya məntəqələri uşaq peyvəndləri ilə bağlı çeşidli maarifləndirici materiallar ilə təmin edilib.  

Azərbaycanda COVID-19 pandemiyasına qarşı mübarizə və rutin immunlaşdırma proqramlarının gücləndirilməsi məqsədilə ÜST-nin Azərbaycan Ölkə Ofisi 2021-ci ilin iyun ayından etibarən Avropa İttifaqının maliyyə dəstəyi ilə üç illik COVID-19 əleyhinə Vaksinasiyaya Dəstək layihəsini həyata keçirməyə başlayıb. Layihə Avropa İttifaqı və Ümumdünya Səhiyyə Təşkilatının Azərbaycana davamlı dəstəyinin tərkib hissəsidir.