ÜST və UNICEF Avropa İmmunlaşdırma Həftəsində uşaqların peyvənd olunması ilə bağlı maarifləndirmə kampaniyası aparacaq

 Avropa İttifaqının (Aİ) maliyyələşdirdiyi « Vaksinasiyaya Dəstək » layihəsi çərçivəsində Ümumdünya Səhiyyə Təşkilatı (ÜST) BMT-nin Uşaq Fondu (UNICEF) ilə birlikdə Azərbaycanda 24-29 aprel tarixlərində keçiriləcək Avropa İmmunlaşdırma Həftəsi ilə bağlı silsilə tədbirlərə start verib.  

ÜST-nin tövsiyəsinə əsasən 6 aprel 2023-cü il tarixində Səhiyyə Nazirliyi tərəfindən respublikanın bütün şəhər və rayonlarında “İmmunlaşdırma həftəsi” keçirilməsi ilə bağlı əmr imzalanıb. Bu əmrə uyğun olaraq, ÜST-nin texniki dəstəyi ilə 2022-ci ilin göstəricilərinə görə peyvəndlərlə əhatə səviyyəsi xüsusilə aşağı olan 11 rayonda monitorinqlər keçiriləcəkdir. Eyni zamanda bu rayonların 4-də - Göygöl, Mingəçevir, Yevlax  və Qobustanda ÜST və UNICEF Azərbaycan Respublikası Səhiyyə Nazirliyi, Tibbi Ərazi Bölmələrini İdarəetmə Birliyi (TƏBİB) və İcbari Tibbi Sığorta üzrə Dövlət Agentliyinin təşkilatçılığı ilə “Peyvəndin vaxtını gecikdirmə! Hər doza vacibdir!” şüarı altında valideyn konfransları təşkil edəcəkdir. Bu valideyn konfranslarında Səhiyyə Nazirliyinin mütəxəssis-eksperti, həkim-pediatr valideynlərə peyvəndləmə ilə bağlı dolğun məlumat çatdıracaq və onları maraqlandıran sualları cavablandıracaqdır. Bununla yanaşı bu rayonlarda fəaliyyət göstərən pediatr və vaksinatorlar üçün peyvəndləmə sahəsində son tibbi yeniliklərlə bağlı təlimlərin keçirilməsi nəzərdə tutulub.  

Kampaniya müddəti boyunca əhaliyə ÜST  tərəfindən hazırlanmış rutin immunlaşdırma ilə bağlı maarifləndirici materiallar, o cümlədən rutin peyvəndlərə bağlı miflər haqqında sual-cavab şəklində hazırlanmış broşür və peyvəndlə qarşısı alına bilən xəstəliklər haqqında yenilənmiş kitabça təqdim ediləcəkdir. Həmçinin bu il ÜST-nin Avropa regionunda qızılca və məxmərək infeksiyasına yoluxma hallarının artmasını nəzərə alaraq, bu infeksiyalar haqqında məlumatların əks olunduğu posterlər  əhali arasında paylanılacaqdır.  

Kampaniya çərçivəsində peyvəndləmədən kənarda qalan uşaqların peyvənd olunmağa dəvət edilməsi istiqamətində fəaliyyətlər aparılacaqdır.  

Azərbaycanda COVID-19 pandemiyasına qarşı mübarizə və rutin immunlaşdırma proqramlarının gücləndirilməsi məqsədilə ÜST-nin Azərbaycan Ölkə Ofisi 2021-ci ilin iyun ayından etibarən, Avropa İttifaqının maliyyə dəstəyi ilə üç illik COVID-19 əleyhinə Vaksinasiyaya Dəstək layihəsini həyata keçirməyə başlayıb. Layihə Avropa İttifaqı və Ümumdünya Səhiyyə Təşkilatının Azərbaycana davamlı dəstəyinin tərkib hissəsidir.