USAID və ÜST milli səhiyyə tərəfdaşları ilə birlikdə Bakı şəhərində icma yönümlü səhiyyə xidmətinin  tətbiqi üçün planlama həyata keçirir 

ABŞ Beynəlxalq İnkişaf Agentliyinin (USAID) dəstəyi ilə Ümumdünya Səhiyyə Təşkilatı (ÜST) milli səhiyyə tərəfdaşları ilə birgə 10-14 aprel tarixlərində beş günlük seminar təşkil edib. Seminarın məqsədi 300 000-ə yaxın əhali yaşayan Bakı şəhəri Nəsimi rayonunda kiçik miqyaslı icma yönümlü səhiyyə xidmətinin (İYSX) tətbiq olunması planını hazırlamaqdır. İYSX icmanın xüsusiyyətlərini nəzərə almaqla və icma üzvlərinin fəal iştirakı ilə xəstəliklərin qarşısının alınması və sağlam həyat tərzinin təbliği ilə bağlı müxtəlif qurumların əməkdaşlığını nəzərdə tutur.  

Tədbirin keçirilməsində məqsəd İYSX müdaxilələrini planlaşdırmaq üçün Nəsimi rayonunun prioritet sağlamlıq problemlərini müəyyən etməkdir. Seminarın ilk günündə ölkədə ictimai səhiyyənin inkişafını dəstəkləmək üçün yaradılan “İctimai səhiyyə üzrə potensial qrup” və “İctimai səhiyyə üzrə koordinasiya qrupu” nümayəndələri, yerli səhiyyə qurumlarının təmsilçiləri, Azərbaycan Tibb Universitetinin (ATU) İctimai səhiyyə fakültəsi və müxtəlif kafedralarının müəllimləri və ÜST mütəxəssislərindən ibarət 65 nəfərlik iştirakçı qrupu İYSX-nin prinsip və tətbiq üsulları bərədə məlumatlandırılıb. Onlar üç qrupa bölünərək əhalinin sağlamlığı ilə bağlı məlumat toplamaq və ən çox rast gəlinən sağlamlıq problemlərini müəyyən etmək üçün rayonun səhiyyə mərkəzlərinə baş çəkiblər. 

Seminarın növbəti günlərində iştirakçılar səhiyyə mərkəzlərindəki müşahidələrindən istifadə edərək və rayon üzrə digər səhiyyə və demoqrafik məlumatları öyrənərək icmanın səciyyələndirilməsi, sağlamlıq problemlərinin prioritetləşdirilməsi və ətraflı qiymətləndirilməsi üzərində işləyiblər. İşçi qrupları daha sonra rayon üçün ətraflı İYSX planını hazırlayacaqlar. Plan 2023-cü il iyununda keçiriləcək birgə iclasda milli səhiyyə qurumları və digər maraqlı tərəflərə təqdim ediləcək.