Ümumdünya Səhiyyə Təşkilatı 75-ci ildönümünü qeyd edir 

1948-ci ildə əsası qoyulan Ümumdünya Səhiyyə Təşkilatı (ÜST) bu il 7 aprel – Ümumdünya Sağlamlıq Günündə yaradılmasının 75 illiyini böyük təntənə ilə qeyd edir. Bu tarixi günlə əlaqədar olaraq ÜST tərəfindən “Hamı üçün sağlamlıq” kampaniyası çərçivəsində il boyunca silsilə tədbirlərin keçirilməsi nəzərdə tutulur.  

ÜST-nin 75 illik yubileyi ölkədə və qlobal miqyasda son 70 il ərzində həyat keyfiyyətini yaxşılaşdıran ictimai səhiyyə sahəsində qazanılmış uğurlara nəzər salmağa imkan yaradır. Bu əlamətdar hadisə eyni zamanda hamı üçün sağlamlığa doğru irəliləyişə təkan verməklə, yaxın gələcəkdə səhiyyə sahəsində gözlənilən çətinliklərlə mübarizə aparmaq üçün bir fürsət kimi qiymətləndirilə bilər. 

Bu münasibətlə ÜST-nin Azərbaycandakı nümayəndəsi və Ölkə Ofisinin rəhbəri Dr. Hande Harmancı Azərbaycan Tibb Universitetində (ATU) “Ümumdünya Səhiyyə Təşkilatı: 75 il sağlamlığın keşiyində” mövzusunda çıxış edib. Tədbirdə ATU-nun rektoru Dr. Gəray Gəraybəyli açılış nitqi ilə çıxış edərək təşkilatla yaxın əməkdaşlıqdan məmnun olduğunu bildirib. 200-dən çox tələbənin iştirak etdiyi görüşdə Dr. Harmancı tərəfindən iştirakçılara ÜST-nin missiyası, strukturu, hazırda gördüyü işlər, dünyada və Azərbaycandakı nailiyyətləri və əməkdaşlıq imkanları ilə bağlı məlumat verilib. Tədbirdə sıx əməkdaşlıq və göstərdiyi davamlı dəstəyə görə Dr. Harmancı Dr. Gəraybəyli tərəfindən “Təşəkkürnamə” ilə təltif olunub. Yekunda tələbələrin fikirləri dinlənilib və sualları cavablandırılıb.  

Qeyd edək ki, ÜST-nin konstitusiyası tarixdə sağlamlığı insan hüququ kimi rəsmi şəkildə tanıyan ilk sənəddir. O vaxtdan bəri bu ideyanın həyata keçirilməsi istiqamətində əhəmiyyətli irəliləyişlər əldə edilib. Qlobal miqyasda gözlənilən ömür uzunluğu ən yoxsul ölkələrdə belə 46 yaşdan 73 yaşa qədər artıb. Çiçək xəstəliyinin kökü kəsilib, poliomielit xəstəliyi isə artıq tamamilə aradan qaldırılmaq üzrədir. Bütün bu nailiyyətlər əslində Təşkilatın 75 illik mövcudluğu ərzində gördüyü işlərdən yalnız iki mühüm məqamdır. Bununla yanaşı, 42 ölkədə malyariya aradan qaldırılıb, İİV və vərəm epidemiyaları dayandırılıb, 47 ölkədə ən azı bir tropik xəstəliyə son qoyulub.  

Son beş ildə Ebola və malyariya üçün ilk vaksinlər hazırlanıb və lisenziyalaşdırılıb. Yaxın 3 il ərzində ÜST bu əsrin ən ağır sağlamlıq böhranı olan COVID-19 pandemiyasına qarşı qlobal cavab tədbirlərini koordinasiya edib. 

Azərbaycanda da səhiyyə sahəsində bir çox uğurlar qazanılıb Belə ki, 2002-ci ildə poliomielitdən, 2023-cü ildə malyariyadan azad ölkə statusu verilib. Həbsxanalarda vərəmin profilaktikası və nəzarəti üzrə dünyada növünə görə yeganə olan ÜST-lə Əməkdaşlıq Mərkəzi yaradılıb.  

Çıxışında sözügedən bütün bu məsələlərə toxunan Dr. Harmancı qazanılan hər bir uğurun əldə edilməsində məqsədyönlü birgə fəaliyyətin rolunun olduğunu diqqətə çatdırıb: “Biz bu nailiyyətləri yerli tərəfdaşlarımızla birlikdə əldə etdik və bu fəaliyyətlərdə aparıcı rol oynamaqdan qürur duyuruq. Ümid edirəm ki, bundan sonra da əlaqələrimiz daha da güclənəcək və universal tibbi təminata nail olacağıq”.