BMT-nin Su məsələlərinə dair konfransında Azərbaycanın bu sahədə təcrübələri müzakirə olunub

22-24 mart 2023-cü il tarixlərində dünya ölkələri ABŞ-ın Nyu York şəhərində Birləşmiş Millətlər Təşkilatının (BMT) Su məsələlərinə dair Konfransında bir araya gəlib. BMT-nin baş qərargahında baş tutan tədbirin məqsədi, dünyada su böhranını aradan qaldırmaq, dünya ölkələrinin öhdəsinə düşən məsələləri müzakirə etmək və hər bir şəxsin bu məsələyə diqqətini cəlb etmək olub.  

Konfrans çərçivəsində Azərbaycanın bu sahədə təcrübələrinə dair xüsusi paralel sessiya həyata keçirilib. Tədbirdə Azərbaycanda müxtəlif tədbirlər vasitəsilə Dayanıqlı İnkişaf Məqsədlərinə (DİM) nail olunmasını sürətləndirmək üçün su sektorundakı islahatlar, maraqlı tərəflərin cəlb edilməsi və innovasiyalar üzrə ölkə təcrübəsinin müzakirəsi baş tutub. Konfrans çərçivəsində Ekologiya və Təbii Sərvətlər Nazirliyi naziri Muxtar Babayev ilə BMT-nin Ərzaq və Kənd Təsərrüfatı Təşkilatının (FAO) Baş direktoru Qu Donqyu və Beynəlxalq Miqrasiya Təşkilatının (BMqT) Baş direktorunun müavini Daniels Uqoçi arasında ikitərəfli görüş keçirilib. Görüşdə meşələrin mühafizəsi, bioloji müxtəlifliyin qorunması, su resurslarının səmərəli idarə olunması məsələləri və Azərbaycanın bu çərçivədə fəaliyyətləri müzakirə olunub.

İkitərəfli görüşlər zamanı həmçinin su ehtiyatlarının azalması, səmərəli idarə edilməsi, qlobal iqlim dəyişikliyi ilə mübarizə, erkən xəbərdarlıq və müasir müşahidə sistemlərinin vacibliyi sahəsində fikir mübadiləsi aparılıb, Azərbaycanla gələcək əməkdaşlıq imkanları müzakirə olunub.

BMT-nin Ərzaq və Kənd Təsərrüfatı Təşkilatının (FAO) Azərbaycan ofisinin təşkilatçılığı, Ekologiya və Təbii Sərvətlər Nazirliyinin koordinasiyası, Beynəlxalq Miqrasiya Təşkilatının, Azərbaycan Meliorasiya Elmi-Tədqiqat İnstitutunin və ABŞ-ın Arizona Dövlət Universitetinin təşkilatçılığı ilə keçirilən tədbirdə açılış nitqi ilə çıxış edən Ekologiya və Təbii Sərvətlər naziri Muxtar Babayev Azərbaycanda Dayanıqlı İnkişaf Məqsədləri ilə bağlı görülmüş işlər barədə məlumat verib və bu məqsədlərə nail olmaqda qlobal əməkdaşlığın vacibliyini vurğulayıb.

“Ətraf mühitin mühafizəsi və iqlim dəyişikliyinin həlli” “2021-2025-ci illər üçün BMT-Azərbaycan Davamlı İnkişaf üzrə Əməkdaşlıq Çərçivəsi” sənədində müəyyən edilmiş prioritet sahələrdən biridir və bu çərçivə sənədində 6-cı DİM “Təmiz su və sanitariya” məqsədinə xüsusi diqqət yetirilir. 2023-cü ildə Ağdam Şəhərində Azərbaycan və BMT-nin ölkə heyəti arasında gücləndirilmiş əməkdaşlıq və tərəfdaşlıq üçün inkişaf edən prioritetlər və imkanlar üzrə illik yüksək səviyyəli strateji məsləhətləşmələr keçirildi. Konfransın əsas müzakirə mövzularından biri 2030-cu il Gündəliyinə uyğun olaraq su ehtiyatlarının səmərəli idarə olunmasını təmin etmək və su çatışmazlığının qarşısını almaq üçün Azərbaycanın milli su siyasətinə dair təcrübələri müzakirə mövzusu olub” Muxtar Babayev öz çıxışında bildirib.

Daha sonra sessiyada çıxış edən  Azərbaycanın BMT-dəki daimi nümayəndəsi Yaşar Əliyev, FAO-nun Torpaq və Su bölməsi üzrə direktoru Lifeng Li,  Beynəlxalq Miqrasiya Təşkilatının Miqrasiya, Ətraf Mühit və Mühafizə şöbəsinin müdiri Manuel Markes Pereyra, Azərbaycanın Dayanıqlı İnkişaf üzrə Milli Əlaqələndirmə Şurasının katibi Hüseyn Hüseynov, Azərbaycan Meliorasiya Elmi-Tədqiqat İnstitutunun direktoru Mir Mövsüm Dadaşev, Arizona Dövlət Universitetinin professoru Olcay Ünvər dünyadakı və Azərbaycandakı su ehtiyyatlarının hazırki vəziyyəti, səmərəli idarə edilməsi, qlobal iqlim dəyişikliyinin su ehtiyatlarına təsiri kimi məsələlərin vacibliyini vurğulayıblar.

Qeyd edək ki seminar "Azərbaycanda təkmilləşdirilmiş su idarəçiliyi: Kənd Təsərrüfatının Davamlı İnkişafına Doğru" layihəsi çərçivəsində FAO-nun təşkilatçılığı və Kənd Təsərrüfatı Nazirliyinin dəstəyi ilə təşkil olunub.

Tədbirin video yazısını buradan izləyə bilərsiniz, tədbirin gündəliyinə dair məlumatla tanış olmaq üçün buraya keçid edə bilərsiniz.