BMT və Azərbaycan Hökuməti əməkdaşlıq çərçivəsinin icrasını müzakirə edib

Birləşmiş Millətlər Təşkilatının (BMT) ölkə üzrə idarə heyəti və Azərbaycan Hökuməti BMT-nin Dayanıqlı İnkişaf üzrə Əməkdaşlığa dair Çərçivə (UNSDCF) sənədinin icrasına dair Birgə İstiqamətləndirici Komitənin üçüncü iclasını keçirib.

BMT-nin Azərbaycandakı rezident əlaqələndiricisi Vladanka Andreeva və İqtisadiyyat nazirinin müavini Sahib Məmmədovun sədrliyi ilə keçirilən iclasda BMT-nin idarə heyəti və hökumətdən 25-ə yaxın yüksək vəzifəli rəsmi şəxs iştirak edib. İstiqamətləndirici Komitə 2022-ci ilin nəticələrini nəzərdən keçirib, 2023-cü il üçün birgə iş planlarını təsdiqləyib və əməkdaşlıq çərçivəsində nəzərdə tutulan işlərin vaxtında icra olunması üçün qarşıda duran sınaqlar və imkanları müzakirə edib.

2022-ci ildə həyata keçirilən fəaliyyətlər pandemiya və münaqişədən dayanıqlı və “yaşıl” bərpa üçün dözümlülüyün və dolanışıq imkanlarının güclənməsinə yönəlmişdi. İnsan kapitalının qurulması, habelə ən həssas və təcrid olunmuş qrupların, o cümlədən qadınlar, uşaqlar, gənclər, əlilliyi olan şəxslər və yaşlı insanların həyat şəraitinin yaxşılaşdırılması əsas fəaliyyət istiqamətlərindən olub. Ötən il həmçinin gücləndirilmiş sosial xidmət sistemləri, dayanıqlı torpaq və su idarəçiliyi, iqlim dəyişikliyinə uyğunlaşma, gender bərabərliyi, DİM-lər üzrə məlumatların toplanması və təhlili, eləcə də dəlillərə əsaslanan strategiya və siyasətlərin işlənib hazırlanması və həyata keçirilməsinə sərmayələr yatırlıb.

2021-2025-ci illəri əhatə edən UNSDCF BMT və Azərbaycan arasında əməkdaşlığa dair imzalanmış sayca 5-ci sənəddir. Bu sənəd əməkdaşlığın dörd prioritet sahəsini müəyyən edib: həssaslığı azaldan və dayanıqlığı təmin edən inklüziv artım; dövlət və sosial xidmətlərin daha yaxşı göstərilməsi üçün daha güclü institutlar; ətraf mühitin mühafizəsi və iqlim dəyişikliyi ilə mübarizə; habelə qadın və qızların səlahiyyətlərini artıran və gender bərabərliyinə əsaslanan cəmiyyətin qurulması.