Füzulidə ilkin tibbi yardım həkimlərinin psixi sağlamlıq problemlərinin həlli potensialı gücləndirilib

Avropa İttifaqının (Aİ) maliyyə dəstəyi ilə Ümumdünya Səhiyyə Təşkilatı (ÜST) Azərbaycan tərəfindən həyata keçirilən “Münaqişədən sonrakı şəraitdə psixi sağlamlıq xidmətlərinin əlaqələndirilməsi və transformasiyası” layihəsi çərçivəsində 17-19 yanvar tarixlərində Füzuli Rayon Mərkəzi Xəstəxanasında mhGAP üzrə təlim proqramı təşkil edilib.

MhGAP ölkələrdə psixi sağlamlıq xidmətlərinə çıxışı yaxşılaşdırmaq üçün icra olunan praktiki yanaşmadır. 2008-ci ildə yarandığı tarixdən başlayaraq mhGAP 100-dən çox ölkədə epilepsiya, şizofreniya və depressiyadan müalicə almağa, o cümlədən intiharın qarşısını almağa və hətta resursları az olan ərazilərdə bir çox insana normal həyat sürməyə kömək edib.

Ən çox rast gəlinən psixi sağlamlıq pozğunluqlarının müəyyən edilməsi, idarə edilməsi və yönləndirilməsi ilə bağlı Ailə Sağlamlığı Mərkəzinin həkimlərini təkimlləşdirmək məqsədilə ixtisaslaşmış milli təlimçilər - Səhiyyə Nazirliyindən Sultana Salmanova və TƏBİB-dən Şəfa Musayeva təlim keçib. İştirakçılar seçilmiş bilik və bacarıqların təcrübədə effektivliyindən əmin olmaq üçün geniş interaktiv rol oyunları və kiçik qrup müzakirələrində iştirak edib.

Klinik depressiya, təşviş pozuntuları, post-travmatik stress gərginliyi və stress kimi psixi sağlamlıq pozuntuları, eləcə də yardım üçün müraciət edən şəxslərə düzgün yanaşmanın təməl prinsipləri təlimin əsas diqqət mərkəzində olan mövzulardır.

Psixi Sağlamlıq Xidmətlərinin Münaqişədən Sonrakı Dövrdə Koordinasiyası və Transformasiyası layihəsi psixi sağlamlıq xidmətlərinin ilkin səhiyyə səviyyəsində təkmilləşdirilməsi məqsədilə ÜST-nin Azərbaycan Ölkə Ofisi tərəfindən Avropa İttifaqının maliyyə dəstəyi ilə həyata keçirilir.

Layihənin məqsədi psixi sağlamlıq və psixo-sosial dəstək üçün multidisiplinar koordinasiya mexanizminin yaradılmasına yardım etmək və ilkin səhiyyə xidməti müəssisələrində psixi sağlamlıq xidmətləri potensialını artırmaqdır. Sözügedən layihə Aİ və ÜST-nin Azərbaycana davamlı dəstəyinin tərkib hissəsidir.