“Azərbaycanın şimal-qərb bölgəsində dayanıqlı və inklüziv aqro-ərzaq sistemlərinin inkişaf etdirilməsi” layihəsinin bağlanış mərasimi keçirilib

Avropa İttifaqı tərəfindən maliyələşən, BMT-nin Ərzaq və Kənd Təsərrüfatı Təşkilatının (FAO) icra etdiyi “Azərbaycanın şimal-qərb bölgəsində dayanıqlı və inklüziv yerli aqro-ərzaq sistemlərinin inkişafi” layihəsinin bağlanış mərasimi keçirilib.

Tədbiri giriş sözü ilə açan BMT-nin Ərzaq və Kənd Təsərrüfatı Təşkilatının Azərbaycandakı Nümayəndəsinin müavini Bariz Mehdiyev bildirib ki, layihənin icrası müddətində Qax, Zaqatala və Balakən rayonlarında 6  dəyər zənciri üzrə 250 istehsalçının cəmləşdiyi 23 istehsal qrupu yaradılıb və kiçik istehsalçılar bu dəyər zəncirinə cəlb olunub. “Layihə iştirakçılarının öz istehsal sahələrini genişləndirmək və eyni zamanda istehsal prosesini bazarın tələblərinə uyğunlaşdırmaları üçün zəruri avadanlıq və alətlərlə təchiz edilib.” Bariz Mehdiyev layihənin regionda turizmə və kənd təsərrüfatının inkişafına töhvə verməklə ümumilikdə seçilmiş rayonların iqtisadiyyatına və əhalinin sosial rifahına verəcəyi dəstəyi vurğulayıb.

Avropa İttifaqının (Aİ) Azərbaycan Respublikasındakı səfiri cənab Peter Mixalko tədbirdə açılış nitqi ilə çıxış edib.. O, layihənin bütün maraqlı tərəflər üçün əhəmiyyətini qeyd edib. “Layihə kiçik sahibkarlara öz gəlir mənbələrini şaxələndirmək və bütövlükdə dolanışıqlarını yaxşılaşdırmaq üçün imkanlar yaratdı. Ölkənin müxtəlif bölgələri arasında balanslaşdırılmış inkişaf və sosial-iqtisadi vəziyyətin daha da yaxşılaşdırılması Aİ-nin Azərbaycana yardımının prioritet istiqamətlərindən biridir”, - deyə cəbab səfir Mixalko bildirib.

Layihənin başlıca məqsədlərindən biri yerli fermer və istehsalçılara dəstək olmaq, yerli qida və məhsulların tanıdılmasını təşviq etməkdir. Tədbir zamanı layihə çərçivəsində layihə çərçivəsində yaradılmış “Yurdumun Ləzzəti” brendinə daxil olan yerli qida məhsulları da iştirakçılara təqdim edilib. Arıçılıq məhsulları, müxtəlif çeşiddə mürəbbələr, qoz- fındıq əzmələri və qurudulmuş meyvə kimi məhsullar sərgilənib. Məhsullarla yanaşı layihə çərçivəsində hazırlanan bölgəyə məxsus “Qida reseptləri” kitabı da təqdim olunub.

Layihənin digər istiqamətlərindən biri də bölgənin turizm potensialını öyrənmək və bu bölgədə aqro turizmə dəstək olmaqdır ki, Qax, Zaqatala və Balakən rayonlarının hər birində 1 aqro turizm mərkəzi müəyyən edilib, təsərrüfat rəhbərləri və işçilər kənd turizmi, satış, qonaqlama xidməti mövzusunda təlimlərə cəlb olunub.Qeyd edək ki, layihə üzrə seçilmiş məhsullar: bal, arıçılıq məhsulları, meyvə qurudulması, mürəbbə istehsalı, bəkməz, qoz-fındıq məshulları və qurudulmuş ət məhsullarıdır.

Layihə çərçivəsində həmçinin Azərbaycanın Şimal-Qərb bölgəsi üzrə müvafıq ərazilərin “Qlobal Əhəmiyyətli Aqrar İrs Sistemi” kimi qeydə alınması istiqamətində fəaliyyətlərə başlanılıb. “Qlobal Əhəmiyyətli Aqrar İrs Sistemləri” həyat və biomüxtəlifliklə dolu estetik gözəlliyin, görkəmli mənzərələrin qeydə alındığı beynəlxalq proqramdır. Bölgədəki insanlar, təsərrüfat sahələri, flora və faunanın mədəni irs kimi qeydə alınması planlaşdırılır.

Tədbirdə BMT-nin Rezident Əlaqələndiricisinin ofisi, Avropa İttifaqı, Azərbaycan Respublikasının Kənd Təsərrüfatı Nazirliyi, yerli icra hakimiyyətlərinin rəhbər nümayəndələri, bir sıra beynəlxalq təşkilatların həmçinin, qeyri-hökumət təşkilatların, fermer assosiasiyaların, özəl təşkilatların nümayəndələri də iştirak ediblər.