Səhiyyə Hesabları Sisteminin tətbiqi ilə bağlı ÜST-nin ekspert missiyası Azərbaycana səfər edib

28-29 noyabr 2022-ci il tarixində Səhiyyə Hesabları Sisteminin (SHS) tətbiqi ilə bağlı ÜST-nin missiyasının Azərbaycana səfəri həyata keçirilib. Missiya çərçivəsində ekspertlər Maliyyə Nazirliyi, Səhiyyə Nazirliyi, İcbari Sığorta üzrə Dövlət Agentliyi, TƏBİB, Dövlət Statistika Komitəsi və beynəlxalq tərəfdaşlarla görüşlər keçirib. Görüş iştirakçıları səhiyyə xərclərinin izlənilməsi, məlumatların və beynəlxalq müqayisələrin təmin edilməsinə dəstək göstərən ÜST-nin SHS aləti haqqında məlumatlandırılıb və SHS-nin Azərbaycanda tətbiqi imkanları müzakirə edilib. 

Missiyanın ikinci günü dövlət qurumu nümayəndələrinin iştirakı ilə təşkil olunmuş seminarda çıxış edən ekspertlər SHS-nin tətbiqi prosesi, məlumat axınının təmini, tələb olunan vaxt və resurs barədə məlumatlandırıb. Seminarda həmçinin, son illərdə Azərbaycanın səhiyyə sistemində aparılan islahatlar, səhiyyənin maliyyələşmə mexanizmləri və səhiyyə xərclərinin axını haqqında danışılıb. 

Qeyd edək ki, SHS səhiyyə sisteminin fəaliyyətini izləmək və qiymətləndirmək məqsədilə analitik alət kimi istifadə olunur. Bundan əlavə, səhiyyə xərclərinin SHS metodologiyasına əsaslanaraq izlənməsi üsulu siyasətçilərə ənənəvi fiskal təhlil ilə müqayisədə tibbi xidmətlərin istifadəsi haqqında zəngin məlumat verir. 

ÜST ölkə kontekstinin öyrənilməsi, ilkin qiymətləndirmələrin aparılması, yerli potensialın yaradılması və SHS prosesinin davamlılığının təmin olunması üçün Azərbaycana texniki dəstək göstərməyə davam edir.