Beynəlxalq Miqrasiya Təşkilatının Azərbaycan nümayəndəliyi və Dövlət Sosial Müdafiə Fondu əməkdaşlığa dair niyyət protokolu imzaladılar

Sənəd BMqT ilə DSMF arasında bir sıra sahələrdə - münaqişələrdən zərər çəkmiş insanlar da daxil olmaqla həssas əhalinin, readmissiya edilmiş vətəndaşların və könüllü qayıdanların sosial yardımla səmərəli şəkildə təmin edilməsi üçün beynəlxalq standartlara və qabaqcıl təcrübələrə uyğun sosial müdafiə tədbirlərinin hazırlanmasını nəzərdə tutur.

Niyyət protokolu, həmçinin Bakıdan kənar regionlara diqqət yönəltməklə, həssas əhali və BMqT-nin benefisiarları arasında DSMF tərəfindən təklif olunan mümkün sosial və iqtisadi yardım imkanları və hüquqi vasitələr haqqında maarifləndirmə işlərinin aparılması, ucqar ərazilərdə yaşayan həssas əhaliyə elektron sosial xidmətlər, eləcə də DSMF-nin xidmətlərinə asan çıxışın təmin edilməsi üzrə hazırlanmış təlim, bilik və bacarıqların artırılması, DSMF tərəfindən göstərilən xidmətlərin monitorinqi və qiymətləndirilməsi sisteminin təkmilləşdirilməsinin dəstəklənməsi, xaricdə yaşayan azərbaycanlı əməkçi miqrantlarla bağlı sosial müdafiə sahəsində məlumatların yayılması və bilik və bacarıqların gücləndirilməsi, habelə onların Azərbaycan Hökuməti tərəfindən göstərilən sosial xidmətlərə çıxış imkanlarının təkmilləşdirilməsi və sair sahələrdə əməkdaşlığı nəzərdə tutur

İmzalanma mərasimində çıxış edən DSMF-in İdarə Heyətinin sədri Himalay Məmişov DSMF və BMqT-in Azərbaycan nümayəndəliyi arasında imzalanan niyyət protokolunun insanların rifahının artırılması və sosial təminat sahəsindəki islahatlara dəstək, həsas insan qruplarına, xüsusən də ölkəyə könüllü olaraq qayıdan Azərbaycan vətəndaşları olan miqrantlar üçün kiçik biznesin yaradılmasına dəstək verilməsi sahəsində, habelə Fondun təklif etdiyi mümkün yardım imkanlarını və hüquqi sənədləri əldə etmək üçün internetə çıxışı olmayan kənd yerlərində insanlar arasında maarifləndirmə fəaliyyəti kimi sahələrdə qarşılıqlı faydalı əməkdaşlığın genişləndirilməsinə geniş imkanlar açdığını qeyd etdi.

BMqT-nin Azərbaycandakı nümayəndəliyinin rəhbəri Vladimir Qyorqjiyev çıxışında bildirdi ki, DSMF ilə əməkdaşlıq əhalinin həssas təbəqələrinə sosial və iqtisadi yardımların göstərilməsi sahəsində əməkdaşlığın genişləndirilməsinə imkan verəcək. Bu protokoldan irəli gələn gələcək fəaliyyətlər həm də nümayəndəliyin Dayanıqlı İnkişaf Məqsədlərinin prioritetləri, BMT və ölkə höküməti arasında imzalanmış Dayanıqlı İnkişaf üzrə Əməkdaşlığa dair Çərçivə sənədi və BMT-nin Azərbaycandakı Miqrasiya Şəbəkəsinin işi ilə uzlaşan strategiyası çərçivəsində məqsədlərə çatmağa töhfə verəcək. O, BMqT-nin səlahiyyətlərinə aid miqrasiya, reinteqrasiya, reabilitasiya, həssas icma üzvləri və insan alveri və gender asaslı zorakılıqların qurbanlarının biznes təşəbbüslərinə dəstək, texniki yardım və qanunvericiliklə bağlı maarifləndirmə fəaliyyətləri kimi sahələrdə DSMF ilə sıx əməkdaşlığa və dəstək verməyə hazır olduqlarını vurğuladı.

Tərəflər qarşılıqlı maraq doğuran məsələlər barədə fikir mübadiləsi apardılar və niyyət protoluna uyğun olaraq gələcək təşəbbüslər üzərində işləmək üçün fəaliyyət planının hazırlanması barədə razılığa gəldilər.