Milli qida təhlükəsizliyinə nəzarət sisteminin qiymətləndirilməsi ilə bağlı tədbir keçirilib

Görüşdə Azərbaycanda qidaya nəzarət sisteminin qiymətləndirilməsi üçün FAO və Ümumdünya Səhiyyə Təşiklatının (ÜST) hazırladığı qiymətləndirmə alətindən  istifadə və gözlənilən nəticələr müzakirə olunub.

Azərbaycan Respublikasının Qida Təhlükəsizliyi Agentliyinin (AQTA) sədr müavini Balarəhim Quliyev, BMT-nin Ərzaq və Kənd Təsərrüfatı Təşkilatının (FAO) Azərbaycandakı Tərəfdaşlıq və Əlaqələndirmə ofisinin müavini Bariz Mehdiyev və Dövlət Gömrük Komitəsinin sədr müavini Cavad Qasımov açılış nitqi ilə çıxış edərək layihə çərçivəsində qida nəzarəti üzrə milli imkanların artırılması istiqaməti üzrə müzakirələr aparıblar.

Milli qida nəzarət sistemi istehlakçıların sağlamlığının qorunmasında və qida ticarətində ədalətli təcrübənin təmin edilməsində mühüm rol oynayır. AQTA, Kənd Təsərrüfatı və Səhiyyə nazirlikləri, Dövlət Gömrük Komitəsi, İcbari Tibbi Sığorta üzrə Dövlət Agentliyi və digər maraqlı tərəflərin nümayəndələrinin iştirakı ilə keçirilən görüşdə FAO və ÜST-nin birgə hazırladığı “Qida təhlükəsizliyinə nəzarət sisteminin qiymətləndirilməsi aləti” konsepsiyasının tətbiqinin üsulları müzakirə olunub. Bildirilib ki, sözügedən konsepsiya milli səviyyədə qida nəzarət sistemlərinin effektivliyinin müəyyənləşdirilməsi və təkmilləşdirilməsində ölkələrə kömək etmək məqsədi daşıyır. Azərbaycanda bu konsepsiyanın tətbiqi qida təhlükəsizliyinə nəzarətin inkişafı üzrə prioritet istiqamətlərin müəyyənləşdirilməsinə imkan verəcək.

Görüşdə həmçinin layihə çərçivəsində qida təhlükəsizliyi və gigiyena mövzusunda ictimaiyyətin məlumatlandırılmasının təmin olunması, sanitariya və fitosanitariya standartlarını tətbiq etmək üçün potensialın artırılması, dövlət müfəttişləri üçün qida nəzarətinin idarə edilməsi üzrə təlimlərin keçirilməsinin zəruriliyi bildirilib. Seminara qoşulan FAO mütəxəssislərinin mövzu ilə bağlı geniş təqdimatından sonra qida təhlükəsizliyinə nəzarət sahəsində metodologiya, beynəlxalq təcrübə ətrafında fikir mübadiləsi aparılıb, qiymətləndirilmə prosesinin həyata keçirilməsində Azərbaycan üçün konkret məqsədlər, gözlənilən nəticələr və tərəflərin icra öhdəlikləri müzakirə olunub.

Tədbirin davamı olaraq 18-21 oktyabr tarixlərində 4 günlük təlimim həyata keçirilməsi planlaşdırılır. Təlimlərdə tərəfdaş qurumların nümayəndələri iştirak edəcək. Təlim zamanı əlaqələndirici şəxslərə qiymətləndirmə prosesinin icmalı, ölkə profili, sübutların toplanması, yoxlanılması, təhlili və nəticələrin təqdim edilməsi müzakirə olunacaq.