Aİ və ÜST COVID-19 əleyhinə vaksinasiyaya dəstək məqsədilə “Mən seçirəm” adlı təşviqat kampaniyasına start verib

Oktyabr-dekabr aylarını əhatə edəcək maarifləndirmə kampaniyası əsas etibarilə, COVID-19 virusunun ən çox təsir etdiyi yaşlılar və yanaşı xəstəliyi olan insanların ağır xəstələnmə riskini nəzərə alaraq peyvəndləməni bu qruplar arasında təbliğ etmək məqsədi daşıyır. Kampaniya həssas əhali qrupları ilə yanaşı ölkə ictimaiyyətinə yönəlmiş mesajları da ehtiva edir.

Kampaniyanın təşviqat materialları “ASAN xidmət” və yüksək sayda risk qrupları nümayəndələrinin müraciət etdiyi “DOST” mərkəzlərində, o cümlədən  “Əczaçılar Klubu İctimai Birliyi”nin vasitəsilə  respublikanın müxtəlif bölgələrində  əczəxanalarda nümayiş olunacaq. Əsasən yaşlılar və yanaşı xəstəliyi olan insanlara vaksiyasiyaya çağırış məzmunlu posterlərlə yanaşı, “ASAN Radio” və digər radio kanallarda maarifləndirici sosial çarxların yayımlanması da planlaşdırılır.  

Ölkədə pandemiya ilə əlaqədar məhdudiyyətlərin azaldığı bir vaxtda insanların COVID-19 virusu əleyhinə qoruyucu tədbirləri fərdi təşəbbüslər əsasında davam etdirməsi və peyvəndin ilkin və buster dozalarını vurdurması pandemiyanın kəskin fazasının 2022-ci ilin sonunadək yekunlaşması və risk qrupları arasında xəstəlikdən ağırlaşmanın və ölümlərin qarşısının alınmasına mühüm töhfə verəcəkdir.

COVID-19 ilə effektiv mübarizə üçün peyvəndləməni təşviq edən kampaniya Avropa İttifaqı və Ümumdünya Səhiyyə Təşkilatının Azərbaycanda pandemiyaya qarşı dövlət qurumlarına texniki dəstək məqsədi daşıyan davamlı dəstəyinin tərkib hissəsidir. Aİ və ÜST-nin COVID-19 pandemiyası ilə mübarizəni dəstəkləmək və gündəlik immunlaşdırma proqramlarını gücləndirməklə ölkənin səhiyyə sisteminə dəstək olmağa davam edir.