Beynəlxalq Miqrasiya Təşkilatının Azərbaycan nümayəndəliyi “Miqrasiya Məktəbi 4” layihəsinin iştirakçılarını qəbul edib

Nümayəndəliyin rəhbəri Vladimir Qyorqiyev və əməkdaşları tələbələrə BMqT-nin tarixi, prinsipləri, onun qlobal layihələri, beynəlxalq, regional və ölkə səviyyəli işlərdə BMqT-nin rolu, nailiyyətləri, beynəlxalq və regional miqrasiya prosesləri, eləcə də BMqT-nin Azərbaycanda fəaliyyəti və layihələri haqqında məlumatlar verdilər. Tələbələr nümayəndəlik tərəfindən həyata keçirilən, İnsan Alverinə Qarşı Mübarizə, Sərhədlərin İdarə Edilməsi, Qeyri-qanuni miqrasiyanın qarşısının alınması, İcmaların inkişafı, miqrantların qayıtması və reinteqrasiyası, Miqrasiya üzrə Regional Təlim Mərkəzi, yeraltı su sistemləri olan Kəhrizlərin bərpası kimi layihələrə və Kanada Viza mərkəzinin fəaliyyəti ilə bağlı məlumatlara böyük maraq göstərdilər.

Dövlət Miqrasiya Xidmətinin təşəbbüsü ilə həyata keçirilən “Miqrasiya Məktəbi” layihəsi gələcəkdə müxtəlif sahələrdə çalışacaq gənclərin miqrasiya sahəsində biliklərinin artırılması, onlarda bu sahəyə maraq oyatmaq, peşəkar bacarıqlar aşılamaq, o cümlədən onları dövlət idarəçiliyi haqqında məlumatlandırmaq məqsədi daşıyır.

Qeyd edək ki, “Miqrasiya Məktəbi” layihəsinin iştirakçıları BMqT-nin Azərbaycan nümayəndəliyi və DMX tərəfinddən BMqT-nin İnkişaf Fondunun maliyyə dəstəyi ilə həyata keçirilən “Azərbaycanda miqrasiya üzrə regional təlim mərkəzinin yaradılmasına dəstək” layihəsi çərçivəsində yaradılmış Təlim mərkəzində keçirilən təlimlərə müntəzəm olaraq qatılırlar.

Layihə, regionda miqrasiya sahəsində hökümətlər və maraqlı tərəflər arasında geniş məlumat mübadiləsi, araşdırma və dialoqa xidmət edəcək miqrasiya üzrə regional təlim mərkəzi vasitəsilə Azərbaycan, MDB və digər xarici ölkələrdə miqrasiya idarəçiliyi sahəsində regional təhsil potensialını və əməkdaşlığı artırmağı hədəfləyir.