Aİ-ÜST layihəsi soyuq zəncir avadanlıqları üzrə təlimlərə start verib

Aİ-ÜST birgə layihəsi olan COVID-19 əleyhinə Vaksinasiyaya Dəstək layihəsi çərçivəsində ÜST-nin dəstəyi ilə Azərbaycan Respublikası Səhiyyə Nazirliyi Respublika Gigiyena və Epidemiologiya Mərkəzi (RGEM) üçün soyuq zəncir sistemi avadanlıqları üzrə təlimlərə start verilib. Təlimlərin əsas məqsədi soyuq zəncir sistemi avadanlıqlarının təhlilini aparmaq üçün ÜST-nin inventarlaşdırma və boşluqların müəyyən edilməsi üzrə alətindən (IGAS) istifadənin öyrənilməsidir.  Bu alətdən istifadə cari peyvənd cədvəli və potensial yeni peyvəndlər əsasında çeşidlər, işlək vəziyyət və davamlı funksionallıq, habelə avadanlıqların baxımı və istifadə xərcləri nəzərə alınaraq soyuq zəncir sistemi avadanlıqları və ehtiyat hissələrin dəyişdirilməsinə dair qərarların qəbul edilməsi üçün çox əhəmiyyətlidir.   

Təlimlərdə RGEM, Dövlət Həkimləri Təkmilləşdirmə İnstitutu və Tibbi Ərazi Bölmələrini İdarəetmə Birliyinin (TƏBİB) əməkdaşları iştirak edirlər. Kursları tamamladıqdan sonra, Səhiyyə Nazirliyinin müəyyən etdiyi 10 təlimçi bölgələrə səfər edərək yerli GEM personalı üçün təlimlər təşkil edəcək. Sonda təlimləri bitirmiş yerli personal peyvənd məntəqələrini ziyarət edərək soyuq zəncir sistemi avadanlıqlarının dəyərləndirilməsini aparacaq.

Təlim müddətində iştirakçılar IGAS alətinin ümumi xarakteristikası, spesifik xüsusiyyətləri və funksiyaları, cihazların identifikasiyası, həcmin ölçülməsi, qaz növünün və modelin müəyyən edilməsi, aktiv və passiv soyuq zəncir cihazı, hərarətin ölçülməsi qurğusu, köməkçi cihazlar haqqında məlumat və digər biliklər əldə edəcəklər. Alət ilə əyani tanışlıq məqsədilə təlim iştirakçıları Səhiyyə Nazirliyinin İnnovasiya və Təchizat Mərkəzinə və Bakıda yerləşən peyvənd məntəqələrinə səfər edəcəklər.  

Azərbaycan da daxil olmaqla, 6 Şərq Tərəfdaşlığı ölkəsində COVID-19 pandemiyası ilə mübarizəni dəstəkləmək və gündəlik immunizasiya proqramlarını gücləndirmək məqsədilə 2021-ci ilin iyun ayından etibarən Avropa İttifaqının maliyyə dəstəyi ilə Ümumdünya Səhiyyə Təşkilatı üç illik COVID-19 əleyhinə Vaksinasiyaya Dəstək layihəsini həyata keçirməyə başlayıb. Layihə Avropa İttifaqı və ÜST-nin Azərbaycana davamlı dəstəyinin tərkib hissəsidir.