Azərbaycanda malyariya ilə yerli yoluxmanın kəsilməsinin sertifikatlaşdırılması üzrə ÜST-nin missiyası öz işini yekunlaşdırıb

2021-ci ilin sentyabr ayında Səhiyyə Nazirliyi Azərbaycanda malyariya xəstəliyinə yoluxmanın kəsilməsi üzrə sertifikatlaşdırma prosesinə başlamaqla bağlı ÜST-nin baş direktoruna rəsmi müraciət ünvanlayıb. Bu proses çərçivəsində 16-20 may 2022-ci il tarixlərində ÜST-nin baş qərargahından Qlobal Malyariya Proqramının Eliminasiya şöbəsinin müdiri Dr. Elxan Qasımov və həmin şöbənin əməkdaşı Dr. Xiao Hong Li daxil olmaqla ÜST-nin sertifikatlaşdırma missiyası Azərbaycanda səfərdə olub.

Missiyanın məqsədi Azərbaycanda malyariya ilə yerli yoluxmanın kəsilməsinin sertifikatlaşdırılması üçün hazırlanmış sənədləri nəzərdən keçirmək və ehtiyac olarsa, təkmilləşdirilməsi üzrə texniki məsləhətlər vermək, malyariyanın ölkədə yenidən yayılmasının qarşısının alınması üçün mövcud proqramı qiymətləndirmək, o cümlədən əvvəllər malyariyanın endemik olduğu ərazilərə səfərlər etmək, habelə Azərbaycanda sertifikatlaşdırma prosesinin vaxt qrafiki ilə bağlı Səhiyyə Nazirliyi ilə müzakirə və konsensus əldə etmək olub.

Səfər zamanı missiya üzvləri mərkəzi və regional səviyyələrdə səhiyyə qurumları ilə bir sıra görüşlər keçiriblər. Ekspertlər Səhiyyə Nazirliyi, Tibbi Ərazi Bölmələrini İdarəetmə Birliyi (TƏBİB), Azərbaycan Dövlət Həkimləri Təkmilləşdirmə İnstitutu, “Azərbaycan Dəmir Yolları” və “Azərbaycan Hava Yolları” Qapalı Səhmdar Cəmiyyətlərinin epidemioloji nəzarət bölmələrinin nümayəndələri ilə görüşüb, Qax, Şəki və Sabirabad bölgələrinə sahə ziyarətləri ediblər.  

Malyariya ilə yerli yoluxmanın kəsilməsinin sertifikatlaşdırılması ÜST tərəfindən ölkənin malyariyadan azad statusunun rəsmi tanınmasıdır. ÜST bu sertifikatı bütün malyariya parazitlərinin yerli ötürülmə zəncirinin ən azı son 3 ardıcıl il müddətində ölkə daxilində kəsilməsi və yoluxmanın qarşısını ala biləcək tam funksional nəzarət və cavab sisteminin mövcudluğuna dair sübutlar olduqda ölkəyə verir.

Azərbaycanda malyariya ilə yerli yoluxmanın kəsilməsinin sertifikatlaşdırılması 2022-ci il üçün planlaşdırılır.