ÜST-nin Avropa üzrə regional direktoru Dr. Hans Henri P. Kluge Azərbaycanda rəsmi səfərdədir

 “Pandemiya keyfiyyətli səhiyyə xidmətlərinin hər kəsə əlçatanlığının təmin edilməsinin vacibliyini bir daha təsdiq etdi ki, bu istiqamətdə də Prezident Əliyevin dəstəyi ilə aparılan səhiyyənin maliyyələşdirilməsi islahatları nəticəsində Azərbaycanın atdığı konkret addımları görməkdən çox məmnunam”, - deyə Dr. Hans Henri P. Kluge qeyd edib.

“2022-ci il Avropa İmmunlaşdırma Həftəsini Azərbaycanda keçirərkən mən tibb tələbələri, yəni gələcəyin peyvəndləmə kampaniyasının liderləri ilə söhbət etməyi və bu prosesində müşahidə etdikləri maneələri aradan qaldırmaq yolları üzrə təkliflərini öyrənməyi səbirsizliklə gözləyirəm. İnanıram ki, bu, hər kəsin peyvəndlə qarşısı alına bilən xəstəliklərdən qorunması üçün mühüm əhəmiyyət kəsb edir. Belə ki, məhz yerli problemlərin həllini yerli üsullarla tapmaq istiqamətində əməkdaşlıq regiondakı bütün ölkələr tərəfindən imzalanan 2020-2025-ci illər üzrə “Daha Sağlam Həyat üçün Birgə Fəaliyyət” adlı Avropa İş Proqramının əsasını təşkil edir”, - deyə Dr. Kluge əlavə edib.

Səfərin ilk günündə Dr. Hans Kluge Azərbaycan Respublikasının Prezidenti İlham Əliyev ilə görüşüb.

Dr. Kluge ÜST-nin pandemiyaya qarşı mübarizədəki səylərinə və COVAX təşəbbüsünə verdiyi dəstəyə görə Prezidentə təşəkkür edib. O, ölkədə səhiyyə xərclərinin azaldılması və səhiyyənin maliyyələşdirilməsi islahatları vasitəsilə hamı üçün keyfiyyətli tibb xidmətlərini təmin etmək üçün göstərdikləri qətiyyətli səylərə görə ölkə rəhbərliyini təbrik edib və səhiyyə sisteminin gücləndirilməsi, ilkin tibbi yardım və səhiyyədə insan resursları kimi sahələrdə ÜST-nin effektiv əməkdaşlığı davam etdirməyə hazır olduğunu vurğulayıb.

Azərbaycan Respublikasının Səhiyyə Nazirliyində yerli səhiyyə qurumları ilə əsasən 2030-cu il Avropa İmmunlaşdırma Gündəliyinə həsr edilmiş bir sıra görüşlər keçirilib. Dr. Hans Kluge Azərbaycan Respublikasının səhiyyə naziri Teymur Musayev, İcbari Tibbi Sığorta üzrə Dövlət Agentliyinin İdarə Heyətinin sədri Zaur Əliyev, Tibbi Ərazi Bölmələrini İdarəetmə Birliyinin (TƏBİB) İdarə Heyətinin sədri vəzifəsinin icraçısı Vüqar Qurbanov, Azərbaycan Tibb Universitetinin (ATU) rektoru Gəray Gəraybəyli və digər rəsmilərlə görüşüb.

Səfər çərçivəsində Heydər Əliyev Fondunun ev sahibliyi ilə Heydər Əliyev Mərkəzində Ümumdünya Səhiyyə Təşkilatı, BMT və inkişaf tərəfdaşları ilə “ÜST-nin Azərbaycanda fəaliyyəti: gələcək əməkdaşlıq naminə fikir mübadiləsi” mövzusunda dəyirmi masa təşkil edilib. ÜST-nin Azərbaycanda 28 illik fəaliyyətini nümayiş etdirmək üçün eyni mövzuda fotosərgi keçirilib.

Səfərin ikinci günündə ÜST-nin regional direktoru Səhiyyə Nazirliyi, İcbari Tibbi Sığorta üzrə Dövlət Agentliyi və TƏBİB ilə birgə son iki il ərzində ÜST-nin Azərbaycandakı İlkin Səhiyyə Nümayiş Layihəsi ərazisi olan Şamaxı rayonuna səfər edəcək. Dr. Kluge Göylər kəndində Avropa İmmunlaşdırma Həftəsi çərçivəsindəki ərazi fəaliyyətləri ilə tanış olacaq, tibb tələbələri və icma liderləri ilə görüşəcək və Şamaxı Təlim Mərkəzini ziyarət edəcək.

ÜST-nin regional direktorunun Azərbaycan səfəri günün ikinci yarısında Həbsxanalarda Vərəmin Profilaktikası və Nəzarəti üzrə ÜST ilə Əməkdaşlıq Mərkəzini ziyarətlə yekunlaşacaq.