Ümumdünya Psixi Sağlamlıq Günündə ÜST Azərbaycan hər kəs üçün psixi sağlamlıq təminatına çağırır

Bu ilin mötəbər günü COVID-19 pandemiyasının başlamasının on səkkizinci ayına təsadüf edir. Bir sıra ölkələrdə həyatın artıq öz normal axışını bərpa etməsinə baxmayaraq, hələ də müəyyən ölkələr var ki, yoluxma və hospitalizasiya nisbətləri yüksək səviyyədə qalır və nəticədə insanların həyatına maneələr törətməkdə davam edir.

Ümumdünya Psixi Sağlamlıq Gününün bu ilki şüarı “Hərkəs üçün psixi sağlamlıq: gəlin bunu reallığa çevirək”dir. Bu kontekstdə Milli Psixi Sağlamlıq və Psixo-sosial Dəstək Mərkəzi tərəfindən pandemiyanın insanların psixoloji vəziyyətinə təsirinə həsr olunmuş virtual görüş təşkil edilib. 

Görüşdə ÜST Azərbaycan, Səhiyyə Nazirliyi, TƏBİB, Psixi Sağlamlıq Mərkəzi və Sosial Xidmətlər Agentliyinin nümayəndələri iştirak edərək psixi sağlamlığın əhəmiyyəti barədə çıxışlar ediblər.

“Gənclər arasında insan itkilərini azaltmaq üçün intiharların qarşısının alınmasına investisiya yatırmalıyıq. Stiqma və qərəz kimi faktorlar geniş yayılmaqla insanların kömək istəməsindən asılı olmayaraq psixi sağlamlığın bütün sahələrinə böyük ölçüdə təsir göstərir. Psixi sağlamlıq üzrə savadlılığın artırılması ələlxüsus psixoloji problemlərə yol açan stiqmanın aradan qaldırılması üçün vacibdir” deyə ÜST-nin ictimai səhiyyə üzrə mütəxəssisi Dr. Elturan İsmayılov açılış nitqində bildirib.

Psixi sağlamlıq ictimai səhiyyənin ən çox diqqətdən kənarda qalan sahələrindən biridir. Bu gün təxminən 1 milyarda yaxın insan psixi pozğunluqdan əziyyət çəkir, hər il 3 milyard insan zərərli alkoqol istifadəsindən və hər 40 saniyədə bir insan intihar nəticəsində dünyasını dəyişir.

 

2021-ci ilin may ayında təşkil olunan Ümumdünya Səhiyyə Assembleyasında dünyanın müxtəlif yerlərindən qoşulan hökümətlər keyfiyyətli psixi sağlamlıq xidmətlərinin bütün səviyyələrdə genişləndirilməsinin zəruriliyini, ÜST-nin 2013-2030-cu illər üçün Əhatəli Fəaliyyət Planını, o cümlədən Planın yenilənmiş həyata keçirilməsi imkanları və əldə olunan nəticələri qiymətləndirəcək göstəriciləri təsdiq etdilər.