Beynəlxalq Miqrasiya Təşkilatının Azərbaycan nümayəndəliyinin dəstəyi ilə “Səhiyyə işçiləri üçün insan alveri qurbanları ilə etik davranış qaydaları” mövzusunda təlim keçirildi

Bu məqsədlə İnsan Alveri Qurbanlarına Yardım Mərkəzi BMqT-nin dəstəyi ilə oktyabr ayının 22-də Şirvan Şəhər Mərkəzi Xəstəxanasında “Səhiyyə işçiləri üçün insan alveri qurbanları ilə etik davranış qaydaları” mövzusunda maarifləndirici tədbir təşkil etmişdir.

Səhiyyə müəssisəsinin 25 nəfər əməkdaşlarının qatıldığı təlim səhiyyə işçilərinin insan alveri qurbanlarına qarşı etik müalicə təlimatları və qaydaları, məxfiliyin pozulmasına görə hüquqi məsuliyyətin mövcudluğu haqqında məlumatlarını artırmağa xidmət etmişdir.

İnsan Alveri Qurbanlarına Yardım Mərkəzinin sosioloqu Günel Əfəndiyeva insan alveri ilə bağlı ictimayyət arasında maarifləndirmə işlərnin aparılmasının vacibliyini qeyd edərək bu məsələdə, həmçinin insan alveri qurbanlarının aşkar olunmasında tibb işçilərinin rolunun əhəmiyyətli olmasını qeyd etdi.  

Təlim zamanı iştirakçılara, həmçinin İnsan alveri haqqında, insan alveri qurbanları və potensial qurbanlar haqqında, insan alverinin ünsürləri, istismarın növləri, insan alverin qurbanlarının əlamətləri, həmçinin insan alverinə qarşı mübarizəyə dair Milli Fəaliyyət Planı və bu sahədə mövcud olan qanunvericilik haqqında ümumi məlumat verildi. 

Təlimin sonunda insan alverinə qarşı mübarizə ilə bağlı videoçarx nümayiş olundu və kitabçalar və bukletlər paylanıldı. Təlim iştirakçılar tərəfindən verilən sualların cavablandırılması ilə yekunlaşdı. 

Səhiyyə müəssisəsinin əməkdaşları mərkəzin və Sosial Xidmətlər Agentliyinin əməkdaşlarından, təlimin təşkili və təqdim edilən məlumatlardan tam razı qaldıqlarını qeyd ediblər. Onlar üçün maraqlı olan məsələlərdən biri insan alveri qurbanlarının indikatorları və onlarla etik davranış formaları olub.

Qeyd edək ki, bundan əvvəl eyni tədbirlər Balakən, Şamaxı, İsmayıllı, Zaqatala və Qusar rayon xəstəxanalarının əməkadaşları üçün də keçirilmişdir. 

Beynəlxalq Miqrasiya Təşkilatının Azərbaycan nümayəndəliyinin ABŞ-ın İnkişaf Agentliyinin maliyyə dəstəyi ilə həyata keçirdiyi “İnsan Alverinə Qarşı Mübarizə Fəaliyyəti” layihəsi mövcud və potensial insan alveri, məcburi əmək və gender əsaslı zorakılıq  qurbanlarına yardım göstərən vətəndaş cəmiyyəti təşkilatlarının sığınacaqlarına texniki və maliyyə dəstəyi göstərir və insan alveri, məcburi əmək və gender əsaslı zorakılıq formaları ilə mübarizə sahəsində çoxtərəfli koordinasiya və əməkdaşlığın genişləndirilməsini dəstəkləyir.