BMT Baş katibi sözçüsünün Ermənistan və Azərbaycanla bağlı bəyanatı

BMT-nin Baş katibi ATƏT-in Minsk Qrupu həmsədrlərinin 24 sentyabr 2021-ci il tarixində BMT Baş Assambleyası çərçivəsində baş tutmuş Azərbaycan və Ermənistan xarici işlər nazirlərinin birgə görüşü barədə bəyanatını alqışlayır.

Baş katib Dağlıq Qarabağ və ətraf ərazilərdə baş vermiş hərbi əməliyyatlardan bir il sonra xarici işlər nazirləri səviyyəsində birbaşa əlaqələrin bərpasından məmnundur və ümid edir ki, bu cür səylər həll olunmamış problemləri çözmək və sülh yolu ilə davamlı həllə nail olmaq üçün daha geniş dialoqun bir parçası olacaq.

Baş katib ATƏT-in Minsk Qrupu həmsədrləri və ATƏT-in fəaliyyətdə olan sədrinin şəxsi nümayəndəsinin səylərini tam dəstəklədiyini bir daha bəyan edir. O, bütün tərəfləri diqqəti bölgədə yaşayan insanların rifahı naminə bütün səviyyələrdə sülhün və əməkdaşlığın təşviqinə yönəltməyə çağırır. BMT bu səyləri hazırda davam edən humanitar, bərpa, inkişaf və sülh quruculuğu işləri ilə dəstəkləməyə hazırdır.