FAO-nun AQTA-ya institusional islahat və idarəetməyə texniki dəstək layihəsi çərçivəsində yekun seminar keçirilib

Onlayn formatda keçirilən seminarda 2019-2020-ci illər ərzində AQTA-ya institusional islahat və idarəetməyə texniki dəstək layihəsi üzrə əldə olunan nailiyyətlər və irəliləyişlərdən bəhs olunub. 

Tədbirin açılış mərasimində BMT-nin Ərzaq və Kənd Təsərrüfatı Təşkilatı Azərbaycan – Tərəfdaşlıq və Əlaqələndirmə Ofisinin rəhbəri Mələk Çakmak və Qida Təhlükəsizliyi Agentliyi sədr müşaviri Elxan Mikayılov çıxış ediblər. “Qida Təhlükəsizliyi yalnız insanların sağlamlığı üçün əhəmiyyətli deyil, həmçinin onların dolanışığının təmin olunması üzrə mühim rola malikdir. Xüsusilə qeyd etmək istəyirəm ki FAO-nun AQTA ilə əməkdaşlığı bu məcrada görülən işlərin əsasını təşkil edir və edəcəkdir.”-deyə Mələk Çakmak öz çıxışında bildirib. Daha sonra çıxış edən Elxan Mikayılov Agentliyin fəaliyyət istiqamətləri və qarşıya qoyulan məqsədlərdən, qida təhlükəsizliyi sahəsində həyata keçirilən islahatlar və Azərbaycan Respublikasında qida təhlükəsizliyinin təmin olunması mərhələlərindən danışıb. O bildirib ki, FAO ilə yeni qida təhlükəsizliyi sisteminin yaradılması məqsədilə uzun yol qət edilib və Agentlik institusional məsələlərdə FAO-nun təcrübəsindən yararlanır. Qeyd olunub ki, bu sahədə gələcək nailiyyətləri təmin etmək üçün risk əsaslı yanaşma prinsipi əsas götürülür ki, bu da ölkəmizdə qida təhlükəsizliyi sisteminin daha da təkmilləşdirilməsinə, yeni qida təhlükəsizliyi mexanizminin inkişafına təkan verir.

Daha sonra Qida Təhlükəsizliyi Agentliyi və FAO-nun layihə üzrə beynəlxalq mütəxəssislərinin təqdimatları baş tutdu. Görüşdə iştirakçılara Qida nəzarət sistemlərində institusional islahatlar, Codex Alimentarius üzrə milli potensialın inkişafı, qida təhlükəsizliyi və qida nəzarət sistemlərində irəliləyiş və prioritetlər və bu sahədə görülən zəruri tədbirlərə dair məlumatlar çatdırıldı.

Görüşdə gələcək əməkdaşlığın daha da genişləndirilməsini nəzərdə tutan qarşıdakı layihələr barədə müzakirələr baş tutdu. Bununla əlaqədar-FAO Qida Təhlükəsizliyi və İstehlakçı Hüquqları Müdafiəsi üzrə mütəxəssisi xanım Mary Kenny, FAO-Türkiyə Ərzaq və Kənd Təsərrüfatı Tərəfdaşlıq Proqramı (FTPP) layihəsidən: Milli qida təhlükəsizliyi sistemlərinin və regional əməkdaşlığın təkmilləşdirilməsi barədə təqdimatı baş tutub. Sonda Fuad Mardiyev-Qida Təhlükəsizliyi Agentliyinin beynəlxalq əlaqələr və protokol şöbəsinin rəhbəri qarşıdakı dövrdə planlaşdırılan “Dayanıqlı milli Kodeks sisteminin yaradılmasına dair layihəni” təqdim etdi.

Seminar çərçivəsində Agentliyin kadr potensialının daha da gücləndirilməsi və laboratoriya imkanlarının təkmilləşdirilməsi istiqamətində həyata keçiriləcək layihələr barədə ətraflı fikir mübadiləsi aparılıb.