BMT və Azərbaycan hökuməti tərəfdaşlığın 25-ci ildönümünü qeyd edən xatirə kitabını təqdim edir

İngilis və Azərbaycan dillərində dərc olunmuş “Birləşmiş Millətlər Təşkilatı - Azərbaycan: Tərəfdaşlığın 25 ili” adlı kitabda 25 illik dövrü əhatə edən tərəfdaşlığın müxtəlif aspektlərini əks etdirən 100-dən artıq fotoşəkil və BMT və Azərbaycan rəsmilərinin çoxsaylı sitatları yer alıb.

Kitabın ön sözündə BMT-nin Azərbaycandakı rezident əlaqələndiricisi Qulam İshaqzai yazır: “Biz tərəfdaşlığımızın 25 ili ərzində həyata keçirilmiş əsas layihələrin və fəaliyyətlərin, habelə əlaqədar insanların və əlamətdar tarixlərin xüsusi retrospektiv nümayişindən zövq alacağınıza ümid edirik”.

“Bu, 1992-ci ildən etibarən əldə olunmuş bütün nailiyyətləri sadəcə olaraq xatırlatmaq imkanı ilə yanaşı, BMT və Azərbaycan arasında davamlı tərəfdaşlıq nəticəsində hamı üçün daha yaxşı gələcək həyat naminə töhfələr vermək imkanının nəzərdən keçirilməsi üçün əlverişli bir fürsətdir”, deyə rezident əlaqələndirici qeyd edib.

Azərbaycanın Xarici İşlər Naziri Elmar Məmmədyarov da xatirə kitabına ön söz yazıb: “BMT və Azərbaycan arasındakı tərəfdaşlığın 25 illik tarixinə işıq salan bu kitab əsas fəaliyyəti, əlamətdar tarixləri və hər iki tərəfin bir-birinin inkişafına verdiyi töhfələri əks etdirir.”

“BMT-yə üzvlük müstəqil dövlət kimi Azərbaycana dünya birliyinə yenidən inteqrasiya imkanı vermişdir. O vaxtdan etibarən Azərbaycan Respublikası ardıcıl şəkildə BMT Nizamnaməsinə qəti sadiqlik nümayiş etdirib və təşkilatla iş ölkənin xarici siyasətinin əsas məqsədlərindən biri olmuşdur”, deyə nazir əlavə edib.

Xatirə kitabında ilk illərdə BMT tərəfindən qaçqınlar və məcburi köçkünlər üçün göstərilən humanitar yardımdan Azərbaycanın BMT-nin həm regional, həm də qlobal fəaliyyətində iştirakına, o cümlədən 2030-cu il Dayanıqlı İnkişaf Gündəliyinin qəbul olunmasına qədər çoxlu sayda məsələlər əhatə olunur və Azərbaycanın BMT-yə üzv qəbul olunması fəxarətlə qeyd edilir.

Kitab tərəfdaşlığın 25 ili ərzində bütün azərbaycanlıların həyatlarını daha da yaxşılaşdırmaq və ümumkilikdə hamı üçün daha yaxşı dünya qurmaq üçün möhkəm zəmin yaradıldığı qənaəti ilə yekunlaşır.