Avropada İİV-ə yoluxmuş şəxslərin yarısında xəstəlik vaxtında diaqnoz olunmayıb

Avropa Birliyi və Avropa İqtisadi Zonası ölkələrində 29,000 nəfərin İİV-ə yoluxması da daxil olmaqla Avropa regionunda 160,000 yeni yoluxma faktı qeydə alınıb. Bu tendensiya 2016-cı ildə davam edib. Mövcud vəziyyətlə bağlı ən narahatedici məqam İİV-ə yoluxanların yarısında (51%) xəstəliyin vaxtında diaqnoz olunmamasıdır.

“Xəstələrin, xüsusilə də yüksək yoluxma riski daşıyan şəxslərin vaxtında müayinə olunmaması müalicənin gecikməsinə və İİV-in sürətlə yayılmasına səbəb olur”,- deyə ÜST-ün Avropa Regional Ofisi üzrə direktoru Dr. Suzanna Yakab qeyd edib.

Dr Yakab həmçinin bildirib ki, “İİV epidemiyası Avropa regionunda, əsasən də regionun şərq hissəsində çox sürətlə yayılmağa davam edir. 160 000 yeni yoluxma faktının təxminən 80%-i də məhz regionun şərq hissəsində qeydə alınmışdır. Bu, bir il ərzində müşahidə olunan yeni yoluxma faktları arasında ən yüksək göstəricidir. Vəziyyət bu cür davam etsə biz 2030-cu ilə qədər İİV epidemiyasının tamamilə aradan qaldırılmasını nəzərdə tutan davamlı inkişaf məqsədinə nail ola bilməyəcəyik”.

ÜST-ə üzv olan dövlətlərin təşəbbüsü ilə 1988-ci ildən etibarən hər il dekabrın 1-i bütün dünyada ümumdünya QİÇS-lə mübarizə günü kimi qeyd olunur. Ümumdünya QİÇS-lə mübarizə günü dünya ictimaiyyətinin böyük diqqətinə səbəb olan beynəlxalq səhiyyə günlərindən birinə çevrilib və bu gün məlumatlılığı artırmaq, QİÇS-dən dünyasını dəyişən şəxslərin xatirəsini yad etmək və müalicə imkanlarının artırılması və qabaqlayıcı tədbirlərin görülməsi kimi nailiyyətləri qeyd etmək üçün əsas imkandır.

ÜST və onun Azərbaycanda fəaliyyət göstərən ofisi Azərbaycan Respublikasının Səhiyyə Nazirliyinə və Respublika QİÇS-lə Mübarizə Mərkəzinə Ümumdünya QİÇS-lə Mübarizə Günü 2017 və "Avropa İİV-ə testləşmə həftəsinə” həsr olunmuş tədbirlərin keçirilməsində, eləcə də bu sahədə əhalinin maarifləndirilməsi ilə bağlı materialların hazırlanmasında öz dəstəyini göstərir.

Erkən diaqnoz yaşamaq şansını artırır və xəstəliyin sürətlə yayılmasının qarşısını alır!

Avropada İİV-ə testləşmənin təkmilləşdirilməsi ilə bağlı metodoloji prinsiplər

İİV test xidmətlərinə dair ÜST-ün ümumi metodoloji prinsipləri İİV ilə bağlı konsultasiya və müayinədən faydalanmaq imkanını artırmaq məqsədilə İİV proqram rəhbərləri, səhiyyə işçiləri və digər tərəfdaşlar üçün nəzərdə tutulub. Bu prinsiplər dünya ölkələrini İİV daşıyıcısı olan şəxslərin 90 faizində 2020-ci ilədək xəstəliyin diaqnoz edilməsini nəzərdə tutan qlobal, regional və milli hədəfin reallaşmasına doğru addım atmaqda dəstəkləyir.