FAO DİM göstəricilərinin milliləşdirilməsi sahəsində Azərbaycanı dəstəkləyir
26 sentyabr 2018
- BMT-nin Ərzaq və Kənd Təsərrüfatı təşkilatı (FAO) və Dövlət Statistika Komitəsinin təşkil etdiyi Dayanıqlı İnkişaf Məqsədlərinin göstəriciləri üzrə məlumatların artırılmasına həsr olunmuş təlim seminarı bu gün öz işinə başlayıb.
Tədbir, DİM-lərin milliləşdirilməsi və FAO-nun dəstəyi ilə 21 göstəricinin hazırlanmasına cəlb olunmuş dövlət qurumlarının 35 təmsilçisini bir araya gətirib.
Seminarın məqsədi iştirakçıların DİM göstəricilərini daha yaxşı bilmələrinə nail olmaq; DİM-lərin regional və milli səviyyədə monitorinqi və həyata keçirilməsində FAO-nun rolunu izah etmək; bütün göstəricilərin metodologiyasını təqdim etmək, onların müəyyənləşdirilməsi üçün tələb olunan məlumat və prosedurlarla tanış etməkdir.
Təlim seminarını Avropa və Mərkəzi Asiya regionu üzrə FAO-nun statistika mütəxəssisi Giorgi Kvinikadze və FAO-nun DİM göstəriciləri üzrə eksperti Zaza Çelidze aparır.
FAO-nun Azərbaycandakı nümayəndəliyinin rəhbəri Mələk Çakmak: “Məlumatların toplanılması, hədəflərin monitorinqi və irəliləyişin ölçülməsi sahəsində yeni, kəsərli üsulların tətbiqi DİM-lərə nail olmaq üçün mühüm amillərdən biridir. FAO nəticə və maneələrin monitorinqi və hesabatlılığını təkmilləşdirmək məqsədi ilə ölkələrin potensiallarının artırılmasını dəstəkləyir.”
Bugünkü tədbir Dövlət Statistika Komitəsinin DİM göstəricilərinin müəyyənləşdirilməsi üçün potensialın artırılmasına dair texniki yardım müraciətinə əsasən FAO-nun hazırladığı müvafiq layihə çərçivəsində təşkil olunub.
Bu təşəbbüsdə iştirak edən BMT qurumları
Bu təşəbbüs vasitəsilə dəstəklədiyimiz məqsədlər
