BMT Ümumdünya İnsan Hüquqları Bəyannaməsinin 70 illiyinə həsr olunmuş sərgi keçirir

Açılış tədbiri dövlət qurumları, BMT, Milli Məclis, vətəndaş cəmiyyəti, akademik dairələr və kütləvi informasiya vasitələrinin 80-ə yaxın nümayəndəsini bir araya gətirib.

Sərgi, Ümumdünya İnsan Hüquqları Bəyannaməsinin insanların gündəlik həyatında nə məna daşıdığını və hər bir insanın bərabər ləyaqəti və dəyərini təbliğ etməklə onlara hansı imkanlar verdiyini əks etdirir. Bugünkü tədbir, həmçinin, dünyada qadın və qızlara qarşı zorakılığa son qoymağı səsləyən “Gender əsaslı zorakılığa qarşı 16 günlük fəallıq” kampaniyasının yekununu qeyd edir.

"Ümumdünya İnsan Hüquqları Bəyannaməsində öz əksini tapan prinsiplər 1948-ci ildəki aktuallığını bu gün də qoruyub saxlayır. Prinsiplər bizi, öz hüquqlarımızı, eləcə də digər insanların hüquqlarını müdafiə etməyə, eləcə də bizi qoruyan hüquqları bilməyə çağırır", BMT-nin Azərbaycandakı rezident əlaqələndiricisi Qulam İshaqzai açılış nitqində bildirib.

Açılış sessiyasında Azərbaycan Respublikasının İnsan Hüquqları üzrə Müvəkkili (Ombudsman) Elmira Süleymanova, Milli Məclisin vitse-spikeri Bahar Muradova, Milli Qeyri-Hökumət Təşkilatları Forumunun  prezidenti Rauf Zeyninin çıxışlarından sonra BMT-nin İnsan Hüquqları üzrə Ali Komissarı Mişel Baçeletin İnsan Hüquqları Günü ilə əlaqədar videomüraciəti səsləndirilib.

Dünyanın müxtəlif yerlərindən karikaturaçı rəssamların Bəyannamənin 30 maddəsinə həsr etdikləri əsərlər və 40 tanınmış qrafik dizaynerin insan hüquqlarına dair təxəyyüllərinin təsvir olunduğu və hər kəsi insan hüquqlarının müadafisinə çağıran posterlər sərgidə nümayiş olunacaq. Bununla yanaşı, ziyarətçilərin BMT agentliklərinin dərc etdiyi müxtəlif nəşr və tədris materialları ilə tanış olmaq və onları əldə etmək imkanı olacaq.

İnsan Hüquqları günü hər il dekabrın 10-da – BMT Baş Assambleyasının 1948-ci ildə Ümumdünya İnsan Hüquqları Bəyannaməsini qəbul etdiyi gündə qeyd olunur. Dünyanın bütün bölgələrindən olan mütəxəssislərin tərtib etdiyi Bəyannamə, bütün xalqlar və insanlar üçün ümumbəşəri dəyərləri və vahid standartı müəyyən edir. 500-dən çox dilə çevrilmiş bu Bəyannamə dünyada ən çox tərcümə olunmuş sənədidir.