FAO qoyunçuluq sektorunun inkişafı üzrə əlaqədar tərəflərin görüşünü keçirib

Tədbir Kənd Təsərrüfatı Nazirliyi, Qida Təhlükəsizliyi Agentliyi, digər dövlət müəssisələri, assosiyasiyalar, beynəlxalq təşkilatlar və özəl sektor nümayəndələrini, eləcə də fermerlər və FAO-nun beynəlxalq mütəxəssislərini bir araya gətirib.

Tədbirin məqsədi qoyunçuluğun dəyər zənciri iştirakçılarını fəal şəkildə cəlb etməklə, qoyunçuluq, habelə ət, dəri və yun daxil olmaqla, emal olunmuş qoyun məhsulları alt-sektorunun cari vəziyyətini təhlil etmək idi. Görüşdə həmçinin, mövcud və potensial çətinliklər, bu sektorun Azərbaycan əhalisinin iş yerləri, gəlir, ətraf mühit, sosial mənfəətlər və digər mühüm iqtisadi fəaliyyətlərə verə biləcəyi faydalar nəzərdən keçirilib.

Görüş Azərbaycan hökümətinin maliyyələşdirdiyi və FAO-Azərbaycan Tərəfdaşlıq Proqramının tərkib hissəsi olaraq 2018-ci ilin dekabr ayından icra olunan qoyunçuluğun davamlı inkişafı və ərzaq məhsullarının istehsalı üzrə dəyər zəncirinin yaradılması layihəsi çərçivəsində təşkil olunub. Layihə çoxaltma və yemləmə strategiyalarının hazırlanması, heyvan sağlamlığı və transsərhəd xəstəliklərin idarəsi sahəsində mövcud çətinlikləri həll etmək, məhsulun bazar tələbatına əsasən hazırlanmasını təmin etmək üçün qoyunçuluq üzrə dəyər zəncirinin fəaliyyətini dayanıqlı şəkildə inkişaf etdirmək məqsədini daşıyır.