BMTİP və ANAMA Azərbaycanda Minalardan Təmizləmə üzrə Beynəlxalq Mükəmməllik və Təlim Mərkəzinin yaradılmasında əməkdaşlığa dair Niyyət Bəyannaməsi imzalayıb

Bakı, 30 may 2024-cü il. BMT-nin baş katibinin müavini, İnkişaf Proqramının Administratorunun müavini, Avropa və Müstəqil Dövlətlər Birliyi üzrə Regional Büronun direktoru İvana Jivkoviç Azərbaycan Respublikasının Minatəmizləmə Agentliyinin (ANAMA) BMTİP ilə birgə təşkil etdiyi Minalardan Təmizləmə üzrə 3-cü Beynəlxalq Konfransda iştirak etmək məqsədilə Azərbaycana səfər edib. “Minaların ətraf mühitə təsirinin azaldılması – Təhlükəsiz və yaşıl gələcək üçün resursların səfərbər olunması” mövzusunda keçirilən konfransdaAzərbaycan ərazisində ANAMA-BMTİP Minalardan Təmizləmə üzrə Beynəlxalq Mükəmməllik və Təlim Mərkəzinin yaradılmasında əməkdaşlığa dair Niyyət Bəyannaməsi imzalanıb.

Xanım Jivkoviç minaların ətraf mühitə təsirinin azaldılması üzrə kollektiv missiyanın katalizatoru kimi resursların səfərbər edilməsinin vacibliyini vurğulayıb: “Minalardan təmizləmə sahəsində çoxlarınızın yorulmaz səyləri sayəsində əldə etdiyimiz nəticələr hamımızı fərəhləndirir. Təcrübəniz, fədakarlığınız və cəsarətiniz bir çox həyatın xilas edilməsinə və təbiətin qorunmasına töhfə verib".

Konfrans çərçivəsində mətbuat üçün birgə brifinq təşkil olunub. Konfrans dayanıqlı həll yollarının kollektiv şəkildə tədqiq edilməsi, beynəlxalq əməkdaşlığın inkişafı, habelə mina və PHS-lərlə çirklənmənin ətraf mühitə təsirinin azaldılması üçün maliyyə resurslarının səfərbər edilməsi yollarının müzakirəsi məqsədilə qlobal liderləri, ekspertləri və maraqlı tərəfləri bir araya gətirib.

Səfər çərçivəsində BMTİP-nin Avropa və MDB üzrə regional direktoru minatəmizləmə, DİM-lər və Azərbaycanda keçiriləcək COP29 Konfransı ilə bağlı fikir mübadiləsi aparmaq məqsədiləbir sıra rəsmi görüşlər keçirib. Xanım Jivkoviç Azərbaycan Respublikası Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev ilə görüşüb. Prezidentin xüsusi tapşırıqlar üzrə nümayəndəsi Elçin Əmirbəyov ilə keçirilən daha bir faydalı görüşdə cari məsələlər müzakirə edilib.