FAO Azərbaycanın 6 iqtisadi rayonunda suvarma sistemləri üzrə təlimlər təşkil edib

Oktyabr və noyabr aylarında  BMT-nin Azərbaycandakı Ərzaq və Kənd Təsərrüfatı Təşkilatının Tərəfdaşlıq və Əlaqələndirmə Ofisi Azərbaycan Respublikasının Kənd Təsərrüfatı Nazirliyi ilə birgə Azərbaycanın Tovuz, Şəmkir, Göyçay, Kürdəmir, Sabirabad, Beyləqan, İmişli, Lənkəran, Biləsuvar, Yevlax və Şəki də daxil olmaqla 11 rayonunda təlimlər təşkil edib. 275 fermerin iştirak etdiyi təlimlərdə müasir suvarma sistemlərinin müxtəlif aspektləri, o cümlədən potensial problemlər müzakirə edilib.

Suyun idarə edilməsi və suvarma üzrə təlimlərin təşkili təşəbbüsü FAO-nun Azərbaycan ofisi tərəfindən 2022-ci ilin dekabrında Azərbaycanın 6 iqtisadi rayonunda 312 fermerlə aparılan sorğuya əsasən  irəli sürülüb. Sorğunun məqsədi su təchizatı ilə bağlı çətinlikləri müəyyən etmək, fermerlərin müasir suvarma sistemlərindən məmnunluğunu qiymətləndirmək və müasir suvarma sistemlərinə keçidlə bağlı fermerlərin  narahatlıqlarını araşdırmaq kimi məsələləri araşdırmaq idi. Sorğunun nəticəsi olaraq rayonlarda təlim sessiyalarının təşkili üçün təlim materialları hazırlanıb.

Dövlət Aqrar İnkişaf Mərkəzlərində (DAİM) təşkil olunan təlimlər zamanı həm qlobal, həm də yerli səviyyədə su ilə bağlı müşahidə olunan problemlər təqdim olunub, su təminatı ilə bağlı yaranan çətinliklərinin qarşısının alınması yolları müzakirə edilib. Müxtəlif növ suvarma alətləri, onlardan istifadə üsulları, əkin sahələrdə istifadənin faydaları nümayiş etdirilib. Təlim məşğələləri zamanı suvarma üsullarına dair məlumatların əks olunduğu tədris materialları paylanılıb.

Qeyd edək, 2023-cü ilin oktyabr ayında başlanan və noyabr ayında tamamlanan təlim tədbirləri, Azərbaycan Respublikasının Kənd Təsərrüfatı Nazirliyi ilə birgə TCP/AZE/3801 “Təkmilləşdirilmiş Su İdarəçiliyi: Kənd Təsərrüfatının Davamlı İnkişafına Doğru” layihəsi çərçivəsində həyata keçirilib.