Beynəlxlaq Miqrasiya Təşkilatının Azərbaycan nümayəndəliyi miqrasiya sahəsində dörd illik Strategiyasını təqdim edib

BMqT-nin Azərbaycan nümayəndəliyinin rəhbəri Vladimir Qyorqiyev tədbirdəki açılış nitqində qeyd etdi ki, təmsil etdiyi qurum Azərbaycanın inkişafına töhfələr verəmək, regional və beynəlxalq əməkdaşlıq çərçivəsində yerli kontekstdə miqrasiyanın idarə edilməsi üçün potensial yaratmaq üçün tərəfdaş kimi yaxşı mövqeyə malikdir. “Qlobal miqrasiya idarəçiliyi, Birləşmiş Millətlər Təşkilatının Dayanıqlı İnkişaf üzrə 2030-cu il Gündəliyi və Təhlükəsiz, Nizamlı və Qanuni Miqrasiya üzrə Qlobal Pakt (Qlobal Pakt) çərçivəsində öhdəliklərinə sadiqliyini nümayiş etdirmək üçün Azərbaycan Hökuməti BMqT-nin əsas tərəfdaşı olan Dövlət Miqrasiya Xidmətinin rəhbərliyi altında miqrasiya fenomeninə effektiv cavab vermək üçün hüquqi potensialı, məlumat və tədqiqat, biliklərin idarə edilməsi, kadrların inkişafı, təlim və kommunikasiya kimi əsas sahələrə ciddi sərmayə qoyub”, deyə Qyorqiyev bildirdi.

O, daha sonra əlavə etdi ki, təmsil etdiyi qurum əsas prioritet sahələri Dayanıqlıq, Mobillik və İdarəetmə olan BMqT-nin Azərbaycan nümayəndəliyini yeni hazırladığı strategiyası çərçivəsində Dayanıqlı İnkişaf üzrə 2030-cu il Gündəliyi və Təhlükəsiz, Nizamlı və Qanuni Miqrasiya üzrə Qlobal Paktdakı öhdəliklərin icras istiqamətində ölkə hökümətinin təşəbbüs və səylərini dəstəkləməkdə davam edəcək.

“Bu Strategiya trendləri, çağırışları və növbəti dörd il ərzində müsbət nəticələrə nail olmaq üçün BMqT-nin hökumət, miqrant icmaları və əsas tərəfdaşlarımızla necə işləyəcəyimizi aydın şəkildə göstərən sənəddir. Strategiya BMqT-nin Strateji Baxış və müvafiq hökümət sənədlərində əks olunmuş mandatını və əsas prioritetlərini, eləcə də BMT və Azərbaycan höküməti arasında imzalanmış 2021-2025-ci illəri əhatə edən Dayanıqlı İnkişaf üzrə Əməkdaşlığa dair Çərçivə sənədində (2021-2025) müəyyən edilmiş prioritetləri təsdiq edir”, deyə Qyorqiyev bildirdi.

Hazırda 280 milyondan artıq insanın ləyaqətli, azad və daha yaxşı həyat üçün öz ölkələrini tərk etdiyini deyən BMT-nin Rezident Əlaqələndiricisi xanım Vladanka Andreyeva Beynəlxalq Miqrantlar Gününün miqrantların cəmiyyətlərimizdəki rolu, onların müsbət töhfələri və öz potensiallarına çatmaqda üzləşdikləri çətinliklər haqqında düşünmək üçün bir fürsət olduğunu qeyd etdi. O, bildirdi ki, Miqrasiya üzrə Qlobal Paktın həyata keçirilməsini, monitorinqini və təhlilini dəstəkləmək və Azərbaycana effektiv, vaxtında və əlaqələndirilmiş dəstəyi təmin etmək üçün biz BMT-nin Miqrasiya Şəbəkəsini yaratdıq və Azərbaycan höküməti ilə imzalanmış 2021-2025-ci illəri əhatə edən Dayanıqlı İnkişaf üzrə Əməkdaşlığa dair Çərçivə sənədi bütün miqrasiya aspektlərini özündə ehtiva edir.

Dövlət Miqrasiya Xidmətinin rəisi Vüsal Hüseynov öz çıxışında keçirilən tədbirin bərabərliyin, müxtəlifliyin və inklüzivliyin təşviqi ilə miqrantların cəmiyyətə səmərəli inteqrasiyasına, onların hüquqlarının müdafiəsinə diqqətin artırılmasına, eləcə də miqrasiya sahəsində yerli və beynəlxalq təşkilatlarla əməkdaşlığın daha da dərinləşməsinə mühüm töhfə verəcəyinə əminliyini ifadə etdi.

Sonra Azərbaycanda uzun illər yaşayan bir miqrantın həyat hekayəsinin, ölkəmizlə  bağlı düşüncələrinin ekranlaşdırıldığı “48: Azərbaycana sonsuz sevgi ilə” adlı qısametrajlı film nümayiş olundu.

Daha sonra “Azərbaycanda miqrasiya sizin obyektivdə” adlı foto müsabiqənin qalibləri mükafatlandırıldı.

Tədbirin bədii hissəsində ölkəmizdə yaşayan, Azərbaycanın zəngin musiqi sənətindən ilhamlanan, onun bənzərsizliyini duyan, təbliğ edən əcnəbilərin ifaları dinlənildi.