BMqT-nin Azərbaycan nümayəndəliyi İnsan alverinə qarşı mübarizəyə dair 2020-2024 – cü illər üçün 4-cü Milli Fəaliyyət Planının (MFP) həyata keçirilməsi ilə bağlı tədbir keçirib

Tədbirdə Daxili İşlər Nazirliyi, Dövlət Miqrasiya Xidməti, Azərbaycan Respublikasının İnsan Hüquqları üzrə Müvəkkili (Ombudsman) Aparatı, Əmək və Əhalinin Sosial Müdafiəsi Nazirliyi, Dövlət Sərhəd Xidməti, Qadın, Ailə və Uşaq Problemləri üzrə Dövlət Dəstəyi Agentliyi, Qeyri-Hökumət Təşkilatlarına Dövlət Dəstəyi Agentliyi, Baş Prokurorluq, Vəkillər Kollegiyası, Dövlət Təhlükəsizliyi Xidməti, Xarici İşlər Nazirliyi, Elm və Təhsil Nazirliyi, Gənclər və İdman Nazirliyi, Ali Məhkəmə, Ədliyyə Nazirliyi, UNRC ofisi, vətəndaş cəmiyyəti təşkilatları 4-cü Milli Fəaliyyət Planının həyata keçirilməsinə verdikləri töhfələrini bölüşdülər və insan alveri qurbanlarına kömək etmək, onların vaxtında müəyyən edilməsi və lazımi qaydada yönəldilməsi üçün daha məqsədyönlü yanaşma üçün həll yolları təklif etdilər.

Bu yanaşma yerli maraqlı tərəflərin bu sahadə qazanılan nailiyyətlərdə payını və davamlılığını aydınlaşdırmağı təmin etdi. Dəyirmi masada insan alverinə qarşı mübarizə ilə məşğul olan vətəndaş cəmiyyəti təşkilatlarının nümayəndələri öz fəaliyyətləri barədə məlumat verib, onları narahat edən məsələləri və gözləntilərini bildiriblər. İnsan Alverinə Qarşı Mübarizə üzrə 4-cü Milli Fəaliyyət Planının icrasında ən yaxşı nəticələrin əldə edilməsi üçün aidiyyəti dövlət qurumları və qeyri-hökumət təşkilatları ilə səmərəli əməkdaşlığın vacibliyi vurğulandı. Əsas diqqətin qurbanların peşə təhsilinə cəlb edilməsi ilə onların davamlılığına yönəldilməsinin vacibliyi qeyd edildi.

Müzakirələr zamanı, həmçinin insan alveri ilə bağlı cinayətlərin araşdırılması və cinayətkarların mühakimə olunması, insan alveri qurbanlarının müdafiəsi, xüsusilə tibbi yardım və yaşayış yeri ilə təminatı, insan alverinin əsas səbəblərinin qarşısının alınması, o cümlədən maarifləndirmə və təbliğat tədbirlərinin roluna toxunuldu. Tədbirdə həm mövcud, həm də potensial donor qurumlarının nümayəndələrinin iştirakı təmin edilmişdir.

Dəyirmi masanın açılış mərasimində BMqT-nin Azərbaycan nümayəndəliyinin rəhbəri Vladimir Qyorqiyev, Azərbaycan Respublikası Daxili İşlər Nazirliyinin İnsan Alverinə qarşı Mübarizə Baş İdarəsinin rəisi, polis general-mayoru Həzi Aslanov və ABŞ Beynəlxalq İnkişaf Agentliyinin (USAID) Azərbaycan üzrə missiyasının direktoru Maykl Nehrbass çıxış etdilər.

BMqT-nin Azərbaycan nümayəndəliyinin rəhbəri cənab Vladimir Qyorqiyev insan alverinə qarşı mübarizədə iştirak edən aidiyyəti dövlət orqanlarının və yerli QHT-lərin nümayəndələrinə insan alveri qurbanların cəmiyyətə reinteqrasiyası, insan alveriçilərinin cinayət məsuliyyətinə cəlb edilməsi və maarifləndirmə üzrə səmərəli fəaliyyət üçün həmkarları ilə məlumat paylaşmaq imkanı verən tədbirin əhəmiyyətini vurğuladı.

ABŞ Beynəlxalq İnkişaf Agentliyinin (USAID) Azərbaycan üzrə missiyasının direktoru Maykl Nirbas insan alverinə qarşı mübarizəyə dair 2020─2024-cü illər üçün “4-cü Milli Fəaliyyət Planı”nın icrası bu problemlə mübarizədə Azərbaycanın töhfəsini verdiyini və qətiyyətini göstərdiyini qeyd etdi.

Daxili İşlər Nazirliyinin İnsan Alverinə qarşı Mübarizə Baş İdarəsinin rəisi, polis general-mayoru Həzi Aslanovun sözlərinə görə 2020-2021-ci illərdə həyata keçirilmiş əməliyyat-axtarış tədbirləri ilə 311 insan alveri, 8 məcburi əmək, habelə insan alveri məqsədilə sənədlərlə qanunsuz hərəkətlərlə əlaqədar 83 cinayət qeydə alınmışdır.

“Məhkəmələr tərəfindən ittiham hökmü çıxarılmış 28 nəfərdən 24-ü azadlıqdan məhrumetmə cəzasına məhkum olunmuş, 2 nəfər şərti məhkum edilmiş, 2 nəfərin cəzası təxirə salınmışdır”, - deyə o bildirdi.

Aslanovun sözlərinə görə müəyyən edilmiş 189 insan alveri qurbanından (184 qadın,                                5 kişi, o cümlədən 2 uşaq) 188-i Azərbayсan Respublikasının vətəndaşı, 1-i əcnəbi olmuşdur. Qurbanlardan 179-u cinsi, 10-u isə əmək istismarına məruz qalmışdır.

Dəyirmi masanın gedişində iştirakçılar qeyd etdilər ki, hökumətin və onun davamlı müttəfiqləri - QHT-lər və beynəlxalq təşkilatların gərgin əməyi və səyləri Azərbaycanı son ildə ciddi irəliləyişlərə, o cümlədən ABŞ Dövlət Departamenti insan alveri ilə bağlı hesabatında 2-ci səviyyə qalxmasına səbəb olub. Onlar ölkənin insan alverinə qarşı mübarizə səylərinə sadiqliklərini və dəstəyini ifadə etdilər və müştərək səylərin Azərbaycana gələcəkdə qeyd olunan hesabatda 1-ci səviyyəyə qalxmasına və insan alverinə qarşı mübarizə üzrə real uğurlu model olmağa imkan verəcəyini vurğuladılar.

BMqT tərəfindən həyata keçirilən USAID-inin maliyyələşdirdiyi İnsan Alverinə Qarşı Mübarizə layihəsi Azərbaycan hökumətinə və QHT-lərə insan alverinin və məcburi əməyin qarşısının alınması və onunla mübarizədə, o cümlədən gender əsaslı zorakılığın aradan qaldırılmasında Azərbaycanın effektivliyini daha da artırmaqda kömək edir. Buraya insan alveri və məcburi əməyin potensial və faktiki qurbanlarına kömək edən sığınacaqlari idarə edən vətəndaş cəmiyyəti təşkilatlarına texniki və maliyyə dəstəyi daxildir.