FAO Azərbaycanda Qlobal Əhəmiyyətli Aqrar İrs Sistemləri məntəqələrinin təyin edilməsinə dəstək olur.

Görüşdə Qlobal Əhəmiyyətli Aqrar İrs Sistemləri GIAHS konsepsiyası və bölgədə potensial GIAHS məntəqələri haqqında layihənin maraqlı tərəflərinə məlumat verilib və Azərbaycan üçün Milli Əhəmiyyətli Aqrar İrs Sistemləri konseptinin ölkə üçün potensialı və imkanları haqqında müzakirələr aparılıb. Aqrar Tədqiqatlar Mərkəzində beynəlxalq və yerli ekspertlərin iştiraki ilə baş tutan görüşdə FAO tərəfindən dünyanın müxtəlif regionlarında müəyyən olunan və qeydiyyata alınan hazırki Qlobal Əhəmiyyətli Aqrar İrs ərazilərinə dair məlumatlar iştirakçılarla paylaşılıb. Qeyd edək ki, hazırda dünyada 22 ölkədə 62 GIAHS məntəqəsi fəaliyyət göstərir.

Görüş zamanı bu ərazilərin idarə olunması təcrübəsi, seçilmə kriteriyaları və onların seçildikdən sonra aqro-turizm üzrə inkişafı iştirakçıların diqqətinə çatdırılıb.

Layihə çərçivəsində Azərbaycanda 3 bölgə potensial GIAHS məntəqəsi kimi müəyyən olunub və qeydiyyatın tamamlanmasına dair fəaliyyətlər davam etdirilir. “Layihə çərçivəsində Qax rayonunda ənənəvi Bal istehsalı sistemi, Zaqatala rayonunda ənənəvi fındıq istehsalı və emalı sistemi, Balakən rayonunda isə ənənəvi xurma istehsalı və emalı sistemi məntəqələrinin təyin olunması üçün müraciətlərə başlanılıb” deyə ekspert görüş zamanı qeyd edib.

Bu il FAO-nun GIAHS Proqramının 20-ci ildönümüdür. FAO GIAHS təşəbbüsünü 2002-ci ildə Yohannesburqda keçirilən Davamlı İnkişaf üzrə Ümumdünya Sammitində irəli sürmüşdür. Yarandığı gündən etibarən GIAHS kimi tanınan kənd təsərrüfatı sistemlərinin sayı tədricən artır və ətraf mühitin, biomüxtəlifliyin və həssas icmaların qorunmasına töhfə verir. Son 7 ildə GIAHS proqramı inkişaf etmiş bütün dünya və Avropa da daxil olmaqla GIAHS tərəfindən tanınan ərazilərin coğrafi əhatəsini genişləndirmişdir.