BMT-nin Azərbaycandakı rezident əlaqələndiricisi Vladanka Andreevanın Gənclərin İqlim Konfransında çıxışı

Zati-aliləri, 

Hörmətli tərəfdaşlar və dostlar, 

Xanımlar və cənablar,

Mən öz çıxışıma bu mühüm Gənclərin İqlimi Konfransını təşkil etdikləri üçün ADA Universitetinə, Böyük Britaniya səfirliyinə və IDEA-ya təşəkkür etməklə başlamaq istərdim.

Dünyada 10-24 yaş arası 1,8 milyard gənc yaşayır ki, bu da tarixin ən böyük gənclər qrupudur. 

Gənclərin fikirlərinin nəzərə alınması zərurəti indi həmişəkindən daha aktualdır. 

Qlobal istiləşmənin sürətlənməsi ən çox onların gələcəyini təhdid edir. Gənclər isə getdikcə daha ədalətli, bərabərhüquqlu  və iqlim dəyişikliklərinə davamlı cəmiyyət qurmaq üçün tədbirlərin görülməsini tələb edirlər.

İki həftə əvvəl, bütün dünyada Yer Kürəsi Günü qeyd edilərkən, verilən ən zəruri mesaj Yer kürəmizin sağalmağa ehtiyacının olmasıdır.

Elm bizə deyir ki, növbəti on il iqlim fəlakətinin qarşısını alınması, çirklənmənin təsirlərini aradan qaldırılması və canlı orqanizm növlərinin hazırda davam edən eksponensial itkisinə son qoyulması üçün bəşəriyyətin son şansdır.

Əsas çətinliklər irəlidədir.

Biz meşələri yenidən əkməli və qorumalıyıq. Biz çayları, dənizləri və okeanları təmizləməliyik. Və biz şəhərləri yaşıllaşdırmalıyıq. 

Bu yolda bizim hər birimizin öz rolumuz vardır. Hər şeydən əvvəl biz bu dəyişikliklərin həyata keçirilməsində gənc nəslə ümid edirik.

Yeni nəsil getdikcə artan daha güclü sosial və ekoloji sayıqlığa, o cümlədən cəmiyyətimizi daha az karbonlu gələcəyə aparacaq enerji və biliyə malikdir.

BMT-nin İqlim Dəyişikliyi Konfransı (COP26) zamanı gənc liderlər Qlazqoda dünyanın hər yerindən müzakirəçilər və nazirlər ilə bir araya gələrək, yaşadığımız dövrdə fəlakətli iqlim dəyişikliyinin qarşısını almaq üçün zəruri tədbirlərin görülməsini tələb etdilər.

Gənclər, həmçinin yerli və milli səviyyədə maarifləndirmə, təhsil proqramlarının həyata keçirilməsi, təbiətimizin mühafizəsi, bərpa olunan enerjinin təbliği və ekoloji cəhətdən təmiz təcrübələrin mənimsənilməsi ilə fəal məşğul olublar.

Bu hərəkatın Azərbaycanda nə qədər güclü olduğunu görmək məni çox sevindirir. 

Bu ölkədə gənclər böyükləri ətraf mühitə biganə qalmamağa və bu sahə üçün ən yaxşı işlər görməyə həvəsləndirir. Mən hər gün belə halların şahidi oluram

Mən bunu, məsələn, biomüxtəlifliyin qorunmasının zəruriliyi haqqında auditoriya maarifləndirmə layihələrində, eləcə də gənclərin ictimai ağacəkmə tədbirlərində və təbiətin mühafizə olunmasına dair digər layihələrdə iştirakında görürəm. 

Və ümid edirəm ki, gənclər dəyişiklik carçıları, sahibkarlar və novatorlar kimi bacarıqlarından istifadə edərək öz valideynlərinə, sinif yoldaşlarına, müəllimlərinə, qonşularına və hökumətlərinə  daha çox və daha yaxşı işlər görməyə təsir edəcək və beləliklə bu ruhlandırıcı sosial səfərbərlik dalğaları güclənməyə davam edəcək.

BMT artıq otuz ildir ki, xüsusən də ölkənin iqlim dəyişikliyi ilə mübarizə və onun zəngin biomüxtəlifliyini qorumaq səylərini dəstəkləməklə Azərbaycanda daha güclü fəaliyyət göstərmək və daha yaxşı işlər görmək üçün çalışır.

Bu onilliklər ərzində BMT-nin İnkişaf Proqramı enerji səmərəliliyinin artırılması, CO2 emissiyalarının azaldılması və ekstrimal hava hadisələrinə davamlılığın artırılması tədbirləri daxil olmaqla iqlim dəyişikliyinə uyğunlaşma və onun təsirlərinin yumşaldılması üzrə məqsədəuyğun siyasətlərin işlənib hazırlanmasına və qəbul edilməsinə dəstək vermək üçün Azərbaycan hökuməti və milli tərəfdaşları ilə sıx əməkdaşlıq edir. 

Eyni zamanda, BMT-nin Ərzaq və Kənd Təsərrüfatı Təşkilatı da dayanıqlı kənd təsərrüfatını dəstəkləmək və ərzaq təhlükəsizliyini gücləndirmək üçün hökumətlə birlikdə çalışır.

Gələcəyə baxsaq ümidverici perspektiv ondan ibarətdir ki, bərpa olunan enerji, innovativ texnologiyalar, təkrar emal və tullantıların idarə olunması daxil olmaqla yeni yaşıl iqtisadiyyata investisiyaların yatırılması gənclər üçün çoxlu sayda və geniş çeşiddə iş yerlərinin yaradılmasına kömək edəcək. 

Bu imkanlar gənclərin davamlı məşğulluğunun təmin edilməsinə və eyni zamanda ətraf mühitlə bağlı ortaq problemlərimizin həllinə kömək edə bilər.

Lakin bu dəyişikliklər nə qədər vacib olsa da, biz inanırıq ki, gənclər üçün daha çox iş görməyin ən yaxşı yolunun gənclərə qərar qəbul etmə masasında yer verərək onları da bu işə cəlb etməkdir.

2030 Proqramının və Dayanıqlı İnkişaf Məqsədlərinin məşəl daşıyıcıları olaraq bugünkü gənclər daha gözəl gələcək üçün ən yaxşı ümidimizdir.

Gənclərin yaxından iştirakı olmadan bu iddialı məqsədlərə nail olmaq və milli iqlim strategiyalarını həyata keçirmək sadəcə mümkün olmayacaqdır. 

Prosesdə onların da fikirlərinin nəzərə alınması və gələcək nəsillərin qorunması üçün  gənclər – layihələrin yaradılmasından onların tətbiqinə və monitorinqinə qədər - hər addımda iştirak etməlidirlər.

BMT-nin Azərbaycandakı nümayəndəliyi yaşıl təşəbbüsləri və iqlim fəaliyyətini təşviq etmək üçün hökumət, vətəndaş cəmiyyəti və gənclərlə birgə fəaliyyətini davam etdirəcəkdir.

Biz gənclərin iqlim dəyişikliyi ilə bağlı bu dialoqda özünəməxsus payı olduğuna qəti şəkildə inanırıq və ümid edirik ki, siz öz fikirlərinizi ən ruhlandırıcı şəkildə ifadə etməyə davam edəcəksiniz.

Təşəkkür edirəm