ÜST münaqişənin təsirinə məruz qalmış 5 rayonda “Sağlamlıq Xəmsəsi” layihəsini yekunlaşdırıb

BMT-nin Fövqəladə Hallara qarşı Cavab Tədbirləri üzrə Mərkəzi Fondunun maliyyə dəstəyi ilə ÜST-nin Azərbaycan Nümayəndəliyi tərəfindən həyata keçirilən layihə Səhiyyə Nazirliyi, İcbari Tibbi Sığorta üzrə Dövlət Agentliyi və TƏBİB-in tərəfdaşlığı ilə baş tutub.

3 ay müddətində səyyar tibbi qruplar 25 kənddə 3 minə yaxın insana xidmət göstərib, onlardan 75%-i qadın və uşaqlardır. Sözügedən regionlardakı tibb işçilərinə psixi sağlamlıq, ilkin pediatrik xidmət və epidemioloji müşahidə ilə bağlı təlimlər keçilib.

5 rayonun xəstəxanaları və ilkin səhiyyə mərkəzləri zəruri tibbi avadanlıqlar və dərman vasitələri ilə təmin edilib. Bunlara 10 ədəd avtoklav, 10 ədəd oksigen konsentratoru, 480 qutu antigen testi, 38 adda avadanlıq və 101 adda dərman vasitəsi daxildir. Qabaqlayıcı tədbirlər və maskalardan düzgün istifadə daxil olmaqla, əhaliyə maarifləndirici materiallar paylanıb.

 “Münaqişə bölgədəki səhiyyə sisteminin yükünü daha da artırdı. Zəruri səhiyyə xidmətlərinə əlçatanlıq münaqişənin təsirinə məruz qalmış bölgələrdə, xüsusilə ucqar kəndlərdə böyük bir problemdir. Bu xidmətlərə çıxışı olmayan insanlara təmənnasız xidmət göstərməklə və sözügedən məsələnin əhəmiyyətini gündəmə gətirməklə layihənin insanların həyatında dəyişiklik yaratdığına inanırıq. Fəaliyyətimizi burada davam etdirə bilmək üçün fəal şəkildə tərəfdaşlar axtarışındayıq”, - deyə ÜST-nin Azərbaycandakı nümayəndəsi Dr. Hande Harmancı layihənin bağlanış mərasimində bildirib.

Layihənin sonunda tibbi səyyar qrupların həkimlərinə və psixoloqlarına sertifikatlar təqdim edilib.