Bakıda Ümumdünya Ərzaq Günü qeyd edilib

Bu il Ümumdünya Ərzaq Günü "Addımlarımız –Gələcəyimizdir. Dünyada 2030-cu ilə qədər Aclığa Son qoymaq mümkündür" mövzusuna həsr edilib.

Tədbirdə IDEA və FAO-nun birgə əməkdaşlığı çərçivəsində hazırlanan qida tullantılarına (12 nömrəli Dayanıqlı İnkişaf Məqsədi - Dayanıqlı istehlak və istehsal modellərini təmin etmək) həsr olunmuş qısa film və FAO-nun baş direktoru Joze Qratsiano da Silvanın Ümumdünya Ərzaq Gününə dair videomüraciəti nümayiş olunub.

İştirakçılar  təkmilləşdirilmiş qidalanma və kənd yerlərinin inkişafı üçün dayanıqlı kənd təsərrüfatının təşviqi mövzusunda panel müzakirələri və aqrobiznesdə fermerlərin uğur hekayələri haqqında videoçarxları izləyiblər.

Tədbir çərçivəsində #MənimAddımlarım (#MyActions) mövzusunda fotoşəkillər, həmçinin təşkilatçılar tərəfindən təqdim edilən nəşr və bukletlərdən ibarət sərgi nümayiş edilib. Sərgiyə Masallı, Ağdam, Lənkəran, İsmayıllı və Balakən rayonlarından olan qadınlardan ibarət Qadın İnkişaf Qruplarının nümayəndələri də öz əlişləri ilə qoşulublar. Sözügedən qruplar Kənd Təsərrüfatı Nazirliyi tərəfindən icra edilən, Azərbaycan Hökuməti və Dünya Bankının birgə maliyyələşdirdiyi Azərbaycan İkinci Kənd İnvestisiya layihəsi çərçivəsində yaradılıb. Qrupların yaradılmasında məqsəd kəndlərdə biznesin qurulması, inkişafı, idarə edilməsi və genişləndirilməsi yolu ilə əhalinin rifahının yaxşılaşdırılmasıdır.

FAO-nun 1945-ci ildə yaranması günü olan 16 oktyabr tarixi Ümumdünya Ərzaq Günü kimi dünyanın 150-dən çox ölkəsində qeyd edilir. Bu günə həsr edilən tədbirlərin əsas məqsədi dünyada aclıq və yoxsulluq problemləri haqqında insanları maarifləndirməkdir.